Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Radio-Kosova e Lirë, në bashkëpunim me TV-Diellin dhe përkrahës e ndihmës të saj, sot shënon 25-vjetorin e kryerjes me sukses të misionit informativ, historik, gjatë luftës së UÇK-së, dhe aktivitetin e shumanshëm të deritanishëm, gjatë këtij çerek-shekulli.
25 vjet më parë, Radio-Kosova e Lirë kishte përgatitur dhe kishte transmetuar emisionin e fundit nga Malet e Berishës, në Rrafshnaltën e Drenicës, pikërisht në ditën kur nga Kosova ishte larguar, përgjithmonë dhe me turp të përjetshëm makineria vrastare e regjimit të Millosheviqit, e cila më 9 qershor kishte nënshkruar kapitullimin pas bombardimit për 78 ditë nga forcat e NATO-s.
Nga 4 janari e deri më 21 qershor të vitit 1999 kjo Radio bashkë me Agjencinë Kosovapress kishin qenë dy institucionet e para informative të themeluara nga Shtabi i Përgjithshëm i Ushtrisë Çlirimtare të Kosovës, që kishin informuar popullatën shqiptare në Kosovë e më gjerë, për luftën, të drejtën, të vërtetën dhe sakrificat e luftëtarëve të lirisë për çlirim nga okupimi e robëria serbe.Ceremonia e shënimit jubilar do të mbahet në ambientet e Shtëpisë-Muze në fshatin Berishë, sot duke filluar në orën 12:00. Janë ftuar për të marrë pjesë gazetarë, reporterë e bashkëpunëtorë të Radios gjatë dhe pas luftës, luftëtarë të lirisë, veprimtarë, veteranë e zyrtarë komunash.
