Më 1 shtator hapet shkolla në Gurishtë të Malishevës

29/08/2016 Institucionet

Sot në mbledhjen e rregullt të Këshillit të Drejtorëve, që drejtohet nga Kryetari i Komunës së Malishevës, Ragip Begaj, u bë e ditur se me një shtator do të bëhet hapja zyrtare e objektit të ri të shkollës në fshatin Gurishtë, e po ashtu, pritet që me një shtator të hapet edhe aneksi i shkollës në Mirushë. Sipas drejtorit të arsimit Avdi Morina, këto dy shkolla, do të mësojnë në një ndërrim dhe me këto, numri i shkollave në territorin e Komunës së Malishevës, që mësojnë në një ndërrim, shkon në dymbëdhjetë shkolla.

Në mbledhjen e sotshme, edhe drejtori për shëndetësi Hajdin Berisha, ka bërë të ditur se, kanë marrë vendim për uljen e gatishmërisë lidhur me ethet hemorragjike krime kongo (EHKK), përkatësisht, kanë zvogëluar orarin e punës së laboratorit në QKMF, pasi rastet e thumbimeve nga rriqrat, kanë rënë dukshëm, por pavarësisht kësaj, kujdesi do të vazhdoj deri më 30 shtator, kur edhe llogaritet se përfundimisht largohet rreziku nga EHKK. Me këtë rast, drejtori Berisha, ka konfirmuar se në këtë vit, në territorin e Komunës së Malishevës, nuk është regjistruar asnjë rast i infeksionit me virusin e EHKK.

Sa i përket sëmundjeve, edhe drejtoria e inspektoratit, përkatësisht shefi i drejtorisë Bardhyl Buçaj, gjatë raportit të tij, ka bërë të ditur se inspektorët komunal, janë duke i inspektuar stallat në tërë territorin e Komunës së Malishevës, lidhur me sëmundjen gungore të kafshëve, por deri më tani nuk kanë hasur në asnjë rast të kafshëve të infektuara.

Gjatë raportimeve të drejtorëve, u bë e ditur, se po vazhdojnë punimet në realizimin e disa projekteve kapitale, kryesisht në infrastrukturë. Drejtori i urbanizmit, Ahmet Morina, duke njoftuar për projektet, tha se gjatë vikendit, ka filluar edhe rregullimi i rrugës për nxënësit e lagjes Dobruna, në Llazicë, në mënyrë që fëmijët e kësaj lagjeje, përkatësisht për rreth 150 nxënës, do të rregullohet rruga nga lagja e tyre, deri në shkollën e fshatit.

Edhe drejtori për buxhet dhe financa, Vesel Krasniqi, ka njoftuar se janë në proces të hartimit të qarkores së dytë buxhetore, ku për këtë qëllim krahas takimeve nëpër fshatra, më 31 gusht, do të mbahet një tryezë, e organizuar nga OSBE dhe me 2 shtator, do të mbahet dëgjimi i fundit publik, me qytetarë dhe me kryetarë të fshatrave të komunës së Malishevës.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara