Më 27 nëntor të vitit 1968 studentët dhe rinia liridashëse e Kosovës kishin zhvilluar në Prishtinë një demonstratë masive

27/11/2016 Lajmet

Tema të tjera...

Më 27 nëntor të vitit 1968, studentët dhe rinia liridashëse e Kosovës kishin zhvilluar në Prishtinë një demonstratë masive, me kërkesa sociale dhe politike. Gjatë protestave është vrarë nga policia serbe, nxënësi, Murat Mehmeti. Në krye të demonstratave ishin Osman Dumoshi , Skënder Kastrati e të tjerë. Demostruesit kishin paraqitur kërkesa si: ”Duam vetëvendosje deri në shkëputje”, ”Poshtë politika kolonialoste ndaj Kosovës”,”Duam bashkimin e të gjitha viseve shqiptare me Kosovën”, ”LNÇ-ja nuk na solli lirinë!”, ”Duam Kushtetutë!”, ”Duam Universitet!”, ”Duam bashkimin e Preshevës… me Kosovën!”.

Ja si e përshkruan demonstratën, Adil Pireva pjesëmarrës

Demonstratat shpërthyen më 27 Nëntor 1968 në Prishtinë, Besianë, Ferizaj dhe Gjilan. Nismën e ndërmori dhe shkëndijën e ndezi një Grup politik nëntanëtarësh i studentëve të Prishtinës, me Osman Dumoshin në krye. Ky grup quhej Komiteti i Demonstratave dhe përbëhej nga Osman Dumoshi, Adil Pireva, Selatin Novosella, Ilaz Pireva, Xheladin Rekaliu, Afrim Loxha, Skënder Muçolli, Skënder Kastrati dhe Hasan Dërmaku.

Bërthama e këtij Grupi vepronte ilegalisht që nga viti 1964, si celulë e të rinjve të Lëvizjes Revolucionare për Bashkimin e Shqiptarëve, themeluar nga simboli i qëndresës shqiptare, Adem Demaçi, tash Hero i gjallë i Kosovës. Ky grup kishte grupe shokësh, përpos në Prishtinë, edhe në qytetet e prejardhjes dhe në qytetet e tjera të Kosovës, disa syresh edhe shokë fëmijërie, por veçanërisht, me lidhje më të afërta, në Podujevë, Ferizaj dhe Gjilan. Numri i tyre ishte mbi 40-50 vetë, me të cilët kishte afri pikëpamjesh dhe marrëdhënie miqësie. Me ta kishte kontakte të pandërprera nëpër shkolla e fakultete dhe ndërmarrje ekonomike, sidomos në Termoelektranën e Obiliqit, kryesisht teknikë, që të punësuar aty, vazhdonin studimet pa shkëputje nga puna. Shto këtu pastaj edhe familjarë, vëllezër e motra dhe të afërm e të njohur të tyre, që ndër të parët ishin njoftuar me organizimin e demonstratave. Këto grupe pastaj me progresion gjeometrik u shtrinë gjithandej nëpër shkolla, fakultete dhe ndërmarrje të ndryshme në mbarë Kosovën dhe kështu u krijua një rrjet prej mijëra njerëzish, që funksionoi për mrekulli në organizimin e demonstratave, jo vetëm në Prishtinë, por edhe në qytetet e tjera të Kosovës. Në organizimin e demonstratave në Prishtinë duhet veçuar nxënësit e shkollave të mesme, veçanërisht të Shkollës Normale dhe të Shkollës Teknike.Qëllimet demonstratave të ‘68-ës kanë qenë: mbrojtja e kërkesave, që tashmë ishin paraqitur legalisht…. (Adil Pireva)