Me numrin 9 në listën e PDK-së, Sala Musë Jashari fton të gjithë votuesit që t’i bashkohen vizionit të saj për një të ardhme më të mirë

Me një vizion të qartë dhe një përkushtim të thellë për të ardhmen e Kosovës, Sala Jashari, kandidate për deputete në Kuvendin e Kosovës nga radhët e Partisë Demokratike të Kosovës, ka zhvilluar një takim të rëndësishëm pune për fushatën zgjedhore. Ky takim u mbajt në shtëpinë e veprimtarit të njohur, Feti Ismajli, në fshatin Hallaq të Lipjanit. Ajo  ishte e shoqëruar nga familjarët e saj dhe u mirëprit me ngrohtësi nga miqtë dhe dashamirët që i kanë dhënë mbështetje të palëkundur në këtë rrugëtim. Sala Jashari është një intelektuale e përkushtuar, një atdhetare e palëkundur dhe një vajzë e çiltër, por me një forcë të brendshme që premton shumë për të ardhmen e vendit tonë. Gjatë fjalimit të saj, ajo shprehu angazhimin për të qenë zëri i drejtësisë, së vërtetës dhe arsyes në Kuvendin e Kosovës. Ajo u zotua të punojë me përkushtim të plotë për të adresuar sfidat kryesore që prekin qytetarët dhe për të ndërtuar një Kosovë më të drejtë, më të zhvilluar dhe me mundësi të barabarta për të gjithë.

Trashëgimia historike dhe familjare e Salës është një burim krenarie dhe frymëzimi. Si vajza e luftëtarit të lirisë, Musa Jashari, dhe mbesa e heroit të njohur, Hamit Jashari, ajo bart me dinjitet emrin e gjyshes së saj heroinë, Sala Jashari. Ky trashëgim e motivon atë të përmbushë me përgjegjësi misionin e saj politik dhe të qëndrojë e vendosur në rrugën e zhvillimit dhe përparimit të vendit.

E vetëdijshme për sfidat që e presin në këtë garë të rëndësishme, Sala Jashari mban mbi supe peshën historike të familjes së saj dhe përkushtimin për të nderuar sakrificat e tyre. Ajo kërkon mbështetjen tuaj, të gjithë qytetarëve të Kosovës, për t’i dhënë mundësinë të bëhet pjesë e Kuvendit të Kosovës dhe të sjellë ndryshimin që vendi ynë ka nevojë. Me numrin 9 në listën e PDK-së, Sala Jashari fton të gjithë votuesit që t’i bashkohen vizionit të saj për një të ardhme më të mirë.