Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Qindra protestues nga Drenica e më gjerë, ishin mbledhur sot para Pallatit të Drejtësisë, në Prishtinë, të cilët kërkonin lirimin e ish-Komandantit të UÇK-së, Sylejman Selimi. Në protestë u kërkua lirimi i menjëhershëm i Gjeneral Selimit dhe i pjesëtarëve të “Grupit Drenica”.
Avokati Tomë Gashi hodhi akuza në drejtim të prokurorëve të EULEX-it lidhur me rastin Drenica i cili është kthyer në rigjykim, duke shtuar se ata po mbahen ende në burg me kundërshtim me të gjitha normat ndërkombëtare e të drejtave të njeriut. Vendime gjyqësore nuk ka. Ne jemi drejtuar institucioneve tona, këta po mbahen në burg për arsye politike. Rasti i tyre është ndarë në dy pjesë. Gjykata Supreme e ka vendimin e anuluar. Ne kemi paraqitur dhjetëra ankesa deri tani por kot, tha Gashi.
Kryetari i Shoqatës së Familjeve të Dëshmorëve, Xhavit Jashari tha kërkesa jonë është e qartë ne po protestojmë për drejtësi për Gjeneral Sylejman Selimin dhe bashkëluftëtaret e tij. Ata qe udhëhoqën luftën sot te mbahen në burg, është turp i madh. Protestuesit mbanin në duar pankartat me mbishkrime Komandant jemi me ty! Mos ma gjyko lirinë! Heroi im Kombëtar!.
Bashkëluftëtari i Sylejman Selimit, Sami Lushtaku i cili po ashtu ka mbajtur katër vjet burg me akuza të rrejshme dhe në fund është shpallur i pafajshëm, ka deklaruar se Sylejman Selimi është i kidnapuar dhe nuk është i burgosur. Ne kërkojmë liri për të dhe të gjithë luftëtarët e UÇK-së, që po mbahen në burgje me akuza të pandehura, ka thënë mes tjerash, ish komandanti i Zonës së Drenicës gjatë luftës dhe disa vjet kryetar i komunës së Skënderajt, Sami Lushtaku.
