Kadri Rexha: Libri i lirisë do ta kalojë edhe këtë pengesë

21/10/2012 Lajmet

Tema të tjera...

Lajmi se organizatori i Panairit të 12-të të Librit „Prishtina 2010“ për të tretën herë me radhë nuk lejoi një stendë për afishimin e librave të botuar nga „Radio-Kosova e lirë“ dhe Redaksia „Dëshmorët e UÇK-së“, ndonëse është lajm skandaloz, tashti më për askë nuk paraqet befasi. Ky veprim i Organizatorit të Panairit të 12-të të librit „Prishtina 2010“ paraqet vetëm një segment të fushatës këmbëngulëse dhe të heshtur të institucioneve shtetërore dhe OJQ-ve të Kosovës për të rrënuar çdo gjë që mban erë historie, kulture dhe kombëtarizmi shqiptar. >>>

Në një shtet ku mohohet identiteti kombëtar i popullit shumicë, ku shkelen aspiratat shekullore të popullit dhe gjaku i dëshmorëve, ku mohohen flamuri, himni dhe simbolet kombëtare, ku vriten, burgosën dhe fyhen heronjtë kombëtar, ku sistematikisht tjetërsohen vlerat tradicionale dhe ku ndërgjegjshëm degjenerohet kultura shpirtërore e kombit edhe ndalimi i Librit të luftës dhe Librit të dëshmorëve të lirisë shkon në përputhje të plotë me natyrën e rendit shtetëror të pranuar dhe të zbatuar nga udhëheqësit shqipfolës vasalë. Sipas logjikës së këtij sistemi, në emër të së nesërmes, shqiptarëve u sugjerohet ta harrojnë të djeshmën dhe pa brenga ta jetojnë të sotmen, të zhveshën nga identiteti kombëtar dhe të lirë të hidhen në prehrin e lumturisë dhe qejfeve të kësaj bote. Sepse është kohë e shpërlarjes së trurit, sepse është kohë e ndërrimit të vlerave. Shqiptarët duhet të harrojnë kolonializmin njëqind vjeçar serb, shqiptarët duhet të harrojnë se kanë bërë luftë çlirimtare, shqiptarët duhet të harrojnë Kosovën e djegur me themel, shqiptarët duhet t’i harrojnë dëshmorët e rënë për liri, shqiptarët duhet t’i harrojnë varrezat masive, gjenocidin, etnocidin… Çka u duhen shqiptarëve librat e përgjakur? Mjaftë më me këngët e lirisë, mjaftë më me ëndërra për bashkimin e Kombit, mjaftë më me përpjekje për bashkimin e trojeve në një Shqipëri etnike!…

Inkuizitorë të rinj, ju e dini se Libri i lirisë shqiptare ndiqet me shekuj, se Libri i lirisë shqiptare ndalohet me shekuj, se Libri i lirisë shqiptare digjet me shekuj. Gjithsesi, ju e dini se librin e lirisë shqiptare gjithmonë e dogjën shqipfolësit: me të njëjtën mendësi, me të njëjtën metodë. Dhe mos harroni: populli mban mend edhe përtej shekujve. Nuk është i largët viti i madh 1981. Ende janë të freskëta burgosjet masive të lules së rinisë shqiptare. Ende mbahet mend sulmi i egër serb kundër historisë dhe kulturës shqiptare. Ende i shohim të gjalla turrat e librave të lirisë në flakët e ferrit serb. Dhe jemi dëshmitar se si përfundoi dhe ku u këput zullumi dhe barbaria serbe. Dhe jemi dëshmitar se si u ndez flaka e lirisë dhe si lindi UÇK-ja e lavdishme. Prandaj, inkuizitorë dhe vasalë modern, prekeni kokën sa nuk është bërë vonë! Dijeni se çdo veprim e ka emrin e vet: lavdia dhe mallkimi jetojnë amshuar. Progresin historik dhe kombëtar shqiptar nuk arritën ta ndalin as romakët, as turqit dhe as serbët. Rendin i gjërave të vendosur nga mijëvjeçarët nuk e ndërron çasti e as moti… Libri i lirisë çau shekujt e errësirës. Libri i lirisë do ta kalojë edhe këtë pengesë.

Organizatori i Panairit të 12-të të Librit, “Prishtina 2010” edhe kësaj radhe anashkaloi monografitë për dëshmorët e UÇK-së

Ashtu sikur edhe në dy vitet e kaluara, edhe tani organizatori i Panairit të Librit “Prishtina 2010”, që ka tubuar dhjetëra botues nga vendi dhe rajoni, nuk ka lejuar një stendë për afishimin e librave, që ka nxjerrë në dritë “Radio-Kosova e lirë” dhe Redaksia “Dëshmorët e UÇK-së”. Edhe kësaj radhe, organizatori i këtij Panairi u tregua mospërfillës për këto botime, të cilat kryesisht trajtojnë tema të luftës së UÇK-së. Në mesin e këtyre librave, “të ndaluar” në Panair janë edhe 12 vëllime të monografisë “Feniksët e lirisë” ku janë prezantuar qindra monografi të dëshmorëve, pastaj tri vëllime të Arkivit të luftës së UÇK-së, botim të cilin e ka financuar Qeveria e Kosovës dhe shumë vepra të tjera autoriale të krijuesve të njohur të vendit tonë.

Postimi në krye të këtyre “shoqatave e lidhjeve” të ish strukturave politike titiste, si Nazmi Rrahmani, Daut Demaku dhe kompania e tyre, ka bërë që gjatë tri viteve të fundit, me rastin e organizimit të “Panairit të librit” të injorohen botimet për dëshmorët e kombit të Redaksisë “Dëshmorët e UÇK-së” dhe botimet e Radios-Kosova e lirë.

Ky injorim,i pashembullt në historinë e librit, pas luftës në Kosovë, na shtyn të angazhohemi në drejtim të themelimit të një shoqate të re të botuesve, (të liruar nga tradita e së kaluarës komuniste, titiste), në radhë të parë të atyre botuesve shqiptarë, që kanë respekt për luftën e UÇK-së dhe për dëshmorët e kombit dhe që kanë botuar e botojnë vepra me përmbajtje kombëtare.

Titujt e librave të botuar nga Redaksia “Dëshmorët e UÇK-së” dhe nga “Radio-Kosova e lirë” >>>

Feniksët e lirisë 1- 12

ARKIVI RKL I II III ( 4. 1. – 21. 6. 1999)

Nezir Myrtaj Jehonë lufte

Ahmet Qeriqi Meditime në arrati, roman

Martin Çuni Reportazhe lufte

Nusret Pllana Rruga e lirisë

Ahmet Qeriqi Në gjurmim të lashtësisë, studime

Nezir Myrtaj 17 e 18 marsi 2004

Ahmet Qeriqi Milush Kopiliqi, serb apo shqiptar?

Nezir Myrtaj Rrugë e papërfunduar

Ahmet Qeriqi Burgu, roman