Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Fushata e partive politike për zgjedhjet e përgjithshme të 12 dhjetorit, tashmë ka hyrë në fazën finale. Partitë politike, të gjitha pa dallim po bëjnë përpjekje ta bindin elektoratin për të marrë votat e tyre, duke dhënë premtime, herë-herë qesharake dhe naive, premtime boshe, të cilat jemi mësuar t’ i dëgjojmë tash e dhjetë vjet. Kjo fushatë, për dallim nga të gjitha fushatat paraprake, karakterizohet me një gjuhë të ashpër dhe shumë agresive, me mungesë të shprehur të kulturës komunikuese, me shembuj të shumtë të arrogancës, sjelljeve shpeshherë primitive dhe me një prepotencë të theksuar uloke e bajraktare.
Agresiviteti, premtimet boshe, prepotenca dhe arroganca janë karakteristikat kryesore të kësaj fushate, e cila po zhvillohet me një frymë tejet të theksuar të intolerancës, duke nxjerrë në shesh tërë arsenalin e retorikës të pa konsumuar kundër njëri tjetrit.>>>
Kjo frymë e keqe e sjelljeve së liderëve politikë gjatë kësaj fushate, po shprehet në ndarje e përçarje edhe më të thellë të njerëzve tanë mbi baza partiake, përçarje kjo e cila shpeshherë po kalon edhe në kacafytje e përplasje.
Deklarimi publik se nuk do të bëhet aleancë me këtë apo atë parti, bëhet për ta konsoliduar mentalitetin militant, me qëllim për të fituar sa më shumë vota dhe me qëllim për të nxitur edhe përplasje, jo vetëm verbale, sikur ndodhi ditë më parë në “Kodrën e Trimave”. Këto deklarata do të zbehen, sapo të publikohet rezultati i zgjedhjeve, sikur ka ndodhur edhe më parë, ashtu sikur ndodhi edhe në Shqipëri, në koalicionin e panatyrshëm të të majtëve të Ilir Metës me të djathtët e Sali Berishës.
Klima e përgjithshme zgjedhore nuk shpreh as minimumin e kulturës së tolerancës për mendimin dhe ofertën ndryshe, ashtu sikur ndodh në shtetet me një përvojë dhe traditë demokratike.
Për dallim nga zgjedhjet e para, që janë organizuar pas luftës në Kosovë, ku kishte një frymë deri diku tolerante, fushata aktuale që po mbretëron në procesin e tashëm zgjedhor tregon një uri të skajshme, të garuesve të shumtë për të marrë qoftë edhe një copë pushtet, për qëllime që kuptohen, dhe kurrsesi jo me qëllim për të fituar Kosova dhe për t’ u avancuar pozita e saj ekonomike e sociale, por vetëm për të realizuar qëllimet e pasurimit dhe për të shfaqur instinktet e ulëta të sundimit mbi njëri tjetrin.
Natyrisht se në mesin e atyre, që konkurrojnë për postin e deputetit ka edhe intelektualë të mirëfilltë, me një bagazh tejet të pasur kombëtar e politik, të cilët tërë jetën ia kanë kushtuar çështjes kombëtare. Të tillët, për veç në raste të veçanta, nuk i shohim askund në listat me prioritet, por diku kah fundi, vetëm sa për ta përmirësuar imazhin patriotik të partive.
Mirëpo në mesin e tyre që kanë marrë guxim ta kërkojnë votën e popullit ka edhe nga mesi i fundërrinave të historisë sonë më të te, në mesin e tyre ka edhe bashkëpunëtorë dhe bij bashkëpunëtorësh të djeshëm e pse jo edhe të sotëm të regjimeve antishqiptare. Ka të tillë që nuk gëzojnë kurrfarë kredibiliteti njerëzor se lërë më kredibilitet kombëtar. Ata, i gjen kudo në radhët e para të listave zgjedhore, sepse janë servilë tipikë, që vazhdimisht janë shtyrë dhe shtyhen me bërryla. Ata kanë paguar dhe paguajnë para të majme për të fituar një vend në Kuvendin e Kosovës, ku edhe 11 vjet pas luftës ende nuk janë ulur më meritorët e kombit, ata që kanë bagazhin më të pasur kombëtar dhe politik në shërbim të kombit e atdheut.
Fushata për zgjedhjet e përgjithshme të 12 dhjetorit po zhvillohet me pompozitet të paparë dhe me një frymë mjaft agresive. Rreziku, që ditën e votimit të ketë përplasje fizike, ndërhyrje kundër njëri tjetrit, se do të ketë përpjekje për ta dhunuar votën, është evident, meqë lufta e paskrupull e disa kandidatëve dhe krerëve të disa partive politike për të fituar me çdo kusht, bën që ata të provojnë jo vetëm format legale të veprimit, por edhe forma të tjera, sado të pista qofshin ato, qoftë duke blerë votat, qoftë duke i vjedhë ato, qoftë duke zhantazhuar në mënyra ndër më të ligat.
Ndodh që një kandidat për deputet, i cili nuk të ka parë as të ka vizituar asnjëherë për 11 vjet pas luftës, madje nuk të ka vizituar, as për raste vdekjeje, të dërgon një SMS, sa për të përkujtuar se i duhet ndihma, se po të fitojë ai, po fituaka tërë Kosova. Ka në këtë mes edhe meskinë, servilë e faqenxirë që kanë ndërruar partitë dhe janë bashkuar me ata, që i kanë sharë me vjet të tëra. Të tillë me siguri se nuk i bën bashkë fati, ardhmëria e begatia e Kosovës, por preja, kulaçi i gatuar me pushtet, që do të ndahet pas zgjedhjeve.
Ka edhe zyrtarë të partive që konsiderojnë se po fituan prapë PDK-ja dhe LDK-ja, duhet fajësuar popullin, i cili, sipas mendësisë së tyre të cekët e uloke, qenka në një krizë të thellë morale. Ka të tillë që reklamojnë frymë të re me mentalitet të kohës së kaluar, të cilët, me parakalime nëpër rrugë dhe në biseda rasti me kalimtarë përpiqen t ia kthejnë “dinjitetin” Kosovës.
Ka partiakë nostalgjikë të komunizmit jugosllavë që kërkojnë votat për të na kthyer në parajsën e dikurshme, të cilës i kanë shërbyer me besnikëri.
Ka të tillë, që dikur janë rreshtuar dhe janë identifikuar me gjysmën e popullit, që nuk ka marrë pjesë në zgjedhje, duke konsideruar se ajo është pjesa më e ndërgjegjësuar, e cila nuk pranon të mashtrohet. Sot, të tillët kërkojnë votat nga po ajo gjysmë, e cila besojmë se edhe kësaj radhe do të jetë po ashtu indiferente, meqë po bindet edhe njëherë se vota është manipuluar dhe po vazhdon të manipulohet, jo sepse jemi të këqij e të pavlerë, por sepse sistemi ekzistues, sistemi aktual politik e juridik që po lëshon rrënjë në Kosovë, nuk është sistem që i shërben popullit, por është sistem dhe rend shoqëror që i shërben kapitalit, shtresë së kamur dhe atyre, që ëndërrojnë të bëhen të pasur duke shkelur e duke shfrytëzuar tjetrin, fukaranë, atë që kurrë nuk ka parë dhe nuk do të shohë ditë të bardhë . Në instalimin dhe jetësimin e një pushteti të tillë, populli është ai që paguan tagrin, zararin, humbjen, pasojat madje edhe pjesa e popullit që nuk merr pjesë në zgjedhje, sepse kështu ka qenë dhe kështu do të jetë përgjithmonë. Me rëndësi është që këtij populli halleshumë të mos i hapin plagë, apo të mos ia lëndojnë plagët ende të pashëruara, duke u thirrur në emër të tij.
Kosovës nuk mund t i kthejnë dinjitetin dhe mirëqenien bashkëpunëtorët e Serbisë, sikur po premtojnë disa syresh, duke lënë të nënkuptohet se ata angazhohen për ta kthyer kohën, kur ky popull i paska pasur të gjitha, duke aluduar në kohën e pushtimit jugosllav, në kohën e regjimit antishqiptar të xhelatit, Josip Broz Tito. Ata që besojnë se shqiptarët kanë pasur ndonjëherë mirëqenie më shumë sesa kanë aktualisht, vetëm sepse atëbotë kanë qenë kryetarë komunash apo sekretarë komitetesh, apo shërbëtorë të neveritshëm të pushtetit okupator serb, ata që mendojnë se në të kaluarën e para luftës në Kosovë ka pasur më shumë liri dhe të drejta kombëtare e njerëzore, madje më shumë sesa ka aktualisht, nuk janë veçse kodoshë dhe matrapazë, që nuk lënë gurë pa lëvizur vetëm për të fituar qoftë edhe një votë më shumë. Mjerisht, me të tillë është e mbushur lista prej më shumë se 1200 kandidatëve për deputetë. Me të tillët, nga cilado parti politike qofshin, ardhmëria e Kosovës vazhdon të mbetet edhe më tej e rrethuar dhe e paparashikuar.
