leoni

Ministri Shala apel bizneseve: Mos i rritni çmimet, të bëhemi bashkë për forcimin e Kosovës

22/11/2018 Institucionet

Ministri i Tregtisë dhe Industrisë, Endrit Shala, në një adresim për media, ka thënë se vendimi për masë 100 për qind ndaj produkteve nga Serbia dhe Bosnja e Hercegovina, është marrë në vazhdën e fuqizimit të prodhuesve të Kosovës dhe fuqizimit të ekonomisë. “Në vazhdën e përpjekjeve tona për të fuqizuar prodhuesit vendorë, për të fuqizuar ekonominë dhe shtetësinë tonë, sot me propozim të Ministrisë së Tregtisë dhe Industrisë, Qeveria vendosi që ta rritë në 100 për qind taksën e importit ndaj produkteve nga Serbia dhe Bosnja e Hercegovina. Ju ftoj të gjithëve, të nderuar qytetarë të vendit tonë, prodhues, tregtarë, që t’i bashkëngjiteni kauzës tonë, për zhvillim të vendit, për rritjen e punësimit dhe mirëqenies për qytetarët tonë”, ka thënë ministri Shala. Po ashtu, ministri ka kërkuar nga prodhuesit që të fokusohen në ngritjen e cilësisë, duke bërë thirrje që të hulumtohet tregu dhe të gjenden alternativa. “Të nderuar prodhues, kërkoj nga ju të fokusoheni në cilësi. Produktet duhet të arrijnë cilësinë e standardit më të lartë në mënyrë që konsumatori/qytetari i Republikës të Kosovës, mos të ketë asnjë mëdyshje në përzgjedhjen e konsumit të tyre ditor. Të nderuar tregtarë, le të bashkohemi dhe të bëjmë zgjidhje kreative. Ta hulumtojmë tregun së bashku dhe të gjejmë vende tjera për të bashkëpunuar. Rritja e eksportit të produkteve dhe jo të mirave materiale, duhet të bëhet prioritet”, ka theksuar ministri Shala. Ministri ka treguar se Serbia dhe Bosnja e Hercegovina janë duke e bllokuar Kosovën në të gjitha aspektet, duke mohuar edhe ekzistencën e Republikës së Kosovës. “Siç e dini prodhuesit kosovarë ballafaqohen me barriera të ndryshme në Serbi, produktet e të cilëve nuk mund të hyjnë në tregun e Serbisë. Sa i përket barrierave tregtare me Bosnjën janë po të njëjtat, si ato me Serbinë. Ministria që unë e udhëheq, e përkrahur po ashtu nga Qeveria e Kosovës, do të fokusohet në rritjen e mirëqenies së qytetarëve të saj, duke krijuar kushte sa më të volitshme për prodhuesit dhe tregtarët vendorë. Andaj shpresojmë në bashkëpunimin dhe mirëkuptimin tuaj në rrugëtimin tonë për të fuqizuar Kosovën, prodhuesin dhe tregun e saj”, ka theksuar ministri Shala.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara