“Flaka e Janarit”, aktivitet me të cilin identifikohet Gjilani

24/01/2019 Institucionet

Është mbajtur manifestimi i 28-të kulturor i Flakës së Janarit në Gjilan, i cili është edhe një ndër aktivitetet me të cilin identifikohet Gjilani. Në kuadër të aktiviteteve, ka nisur Festivali i Dramës Kombëtare “Talia e Flakës”, i cili ka një karakter garues. Në këtë ngjarje mori pjesë edhe zëvendësministrja e Kulturës, Rinisë dhe Sportit, Leonora Morina-Bunjaku, e cila i përshëndeti të pranishmit dhe vlerësoi organizatorët për ngjarjen me të cilën Gjilani mori identitet. “Ndjehem e vlerësuar t’ju drejtohem në emër të MKRS, që me konsideratë po e mbështet këtë Manifestim me besimin e rritës së tij; me vlerësimin për vlerat kulturo-artistike që përfaqëson e paraqet dhe synon t’i ngritë”, tha mes tjerash zëvendësministrja. Duke folur për festivalin, zëvendësministrja tha se ai filloi si “manifestim i kujtesës historike mbi të kaluarën tonë të largët e të afërt; si vlerësim mbi Janarin e Skënderbeut; janarin e përflakur të vëllezërve Gërvalla e Kadri Zeka, Rexhep Mala e Nuhi Berisha dhe vargun e pafund të përpjekjeve, heroizmave e sakrificave për liri”. “Filloi para 28 vitesh që të jetë muzë e lirisë sonë. Me artin skenik, pamor, letrar e muzikor, katër shtyllat e këtij manifestimi u bë identitet kulturor i Gjilanit, vendtakim vlerash artistike”, theksoi mes tjerash zëvendësministrja Morina-Bunjaku, duke shtuar se për pesë net Teatri i Gjilanit do të jetë Olimpi ku do të vijnë dramat e shumta nën interpretimin e shkëlqyeshëm të artistëve nga gjithë hapësirat shqiptare.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara