Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analisti, publicisti dhe punëtori i palodhshëm, Adil Fetahu ka nxjerrë në dritë librin voluminoz: “Në mbrojtje të drejtës dhe drejtësisë”, ku ka prezantuar një duzinë analizash, shënime dhe vështrime aktuale, në të cilat ka trajtuar çështje të ndryshme nga drejtësia, ekonomia, nga çështjet sociale, shkrime për krimet serbe në Kosovë kundër shqiptarëve dhe ka trajtuar një mori problemesh aktuale, që kanë të bëjnë me zhvillimet politike, ekonomike, juridike madje edhe letrare e historike, në vend dhe më gjerë.
Adil Fetahu është studiues dhe analist i thellë i problematikës së përgjithshme shoqërore në vend, autori i shumë shkrimeve publicistike që nga viti 1963 e deri në ditët tona.
Deri tani ka botuar: “Masat e përkohshme-akte të shkatërrimit të ndërmarrjeve ekonomike dhe të institucioneve të Kosovës”, në vitin 1992, “Krijimi dhe rrënimi i Gjyqësorit të Kosovës, Prishtinë, 2001, “Shtegtime nëpër lajme” në dy vëllime dhe në të njëjtën kohë është edhe bashkautor i shumë librave, broshurave e dispensave nga lëmenj të ndryshëm.
Qasja e Adil Fetahut ndaj problemeve të caktuara shoqërore, është qasje origjinale, e orientuar në thellësi të perceptimit realist, të problematikave të cilat i trajton, qasje dhe interpretim i shprehur dhe i shkruar me korrektësi dhe pozicion të qartë prej shkencëtari, që nuk lë gjë pa analizuar në paraqitjen sa më të përgjithshme, analitike dhe sintetike të problemeve, të cilat i merr në shqyrtim.
Është për keqardhje që shkrimet dhe studimet e tilla nuk kanë gjetur financues në institucionet e vendit, por autori është detyruar t’ i nxjerrë në dritë me shpenzime të veta, derisa në Kosovë institucionet tona financojnë publikime të ndryshme ditore, pa ndonjë vlerë konstante dhe pa thellësinë e mendimit kritik e shkencor, sikur kemi të bëjmë me publikimet e arrira dhe shumë dimensionale të publicistit dhe analistit të mirënjohur, Adil Rr. Fetahu.
