Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministri i FSK-së, z. Haki Demolli priti ambasadoren e Republikës së Kroacisë në Kosovë, znj. Marija Kapitanovic. Fillimisht ministri Demolli i uroi ambasadores kroate detyrën e re, dhe pasi i dëshiroi mirëseardhje e falënderoi për ndihmën e vazhdueshme që Kroacia po jep për Kosovën dhe Forcën e Sigurisë së Kosovës. Ministri Demolli, me këtë rast, e njoftoi ambasadoren Kapitanovic me zhvillimet e përgjithshme të Ministrisë që ai drejton, si dhe me zhvillimet e deritashme rreth transformimit të FSK-së në Forca të Armatosura të Kosovës. Gjithashtu ministri i FSK-së i shprehu ambasadores Kapitanovic dëshirën e tij për të rritur bashkëpunimin dypalësh në fushën e mbrojtjes mes dy vendeve nëpërmjet edukimit dhe trajnimeve të përbashkëta.
Nga ana e saj, ambasadorja Kapitanovic, shprehi kënaqësinë për vizitën e saj në Ministrinë e FSK-së, duke nënvizuar bashkëpunimin e deritashëm në mes dy shteteve, veçanërisht në mes Ministrisë së FSK-së dhe Ministrisë së Mbrojtjes së Kroacisë. Ajo vlerësoi lartë sidomos bashkëpunimin e dyanshëm në mes dy forcave, si dhe premtoi rritjen e nivelit të bashkëpunimit në të gjitha fushat që janë me interes edhe për FSK-në. Po ashtu ambasadorja Kapitanovic edhe një herë theksoi se ky bashkëpunim do vazhdojë edhe në të ardhmen në mes dy vendeve dhe dy ministrive.
