Ministri Gashi: Ekspozita “Hartografia evropiane dhe territoret shqiptare” bashkëpunim ndërmjet institucioneve dhe profesionistëve

28/03/2019 Institucionet

Ministri i Kulturës, Rinisë dhe Sportit, Kujtim Gashi, ka marr pjesë në hapjen e ekspozitës “Hartografia evropiane dhe territoret shqiptare” e cila përfshinë harta të koleksionuara të autorit Afrim Ethemi. Në hapjen e ekspozitës morën pjesë edhe ambasadori i Italisë në Kosovë, Piero Cristoforo Sardi dhe ai i Shqipërisë, Qemal Minxhozi. Me këtë rast, ministri Gashi u shpreh se ndihet i nderuar që kjo ekspozitë e rëndësisë së veçantë është organizuar në Muzeun e Kosovës. “Kjo ekspozitë shënon edhe një bashkëpunim ndërmjet institucioneve dhe profesionistëve të profileve të ndryshme”, theksoi ministri Gashi. Ai po ashtu tha: “Ekspozita të tilla me koleksione të hartave nuk shohim shpesh, sepse harta të tilla gjinden rrallë dhe janë të rralla si të tilla, andaj, kjo që po shfaqet, paraqet për mua si ministër por edhe dikasterin që unë e udhëheq një interes për t’i ofruar, paraqitur, promovuar dhe pasqyruar qytetarëve vlera historike dhe kulturore për trashëgiminë e popullit shqiptar”. Më tej ministri Gashi sqaroi se koleksioni i Afrim Ethemit përfshinë gjithsej 40 harta, e që veçohen sidomos hartat e Klaudius Ptolomeut, Giacomo Gastaldit, Zhernand Merkatorit dhe Johan Laurenbergut, të cilët në hartat e tyre me theks të veçantë paraqesin Ilirinë, Epirin, Moezinë, Dakinë, apo thënë më thjeshtë gjeografinë historike të trevave të popullit tonë. “Me këtë, nga ajo se çfarë shihet brenda këtyre hartave, së pari vërtetohet interesi i hartografëve evropianë për shqiptarët, dhe së dyti vërtetohet rëndësia historike por edhe kulturore dhe turistike e trevave shqiptare”, tha ai. Ministri Gashi po ashtu ftoi që ky koleksion me harta, si dëshmi me vlera të veçanta e të dhëna të rëndësishme,të bëhet fondi i veçantë jo vetëm për ekspozim, por edhe për ruajtje dhe të jetë në dispozicion të institucioneve të trashëgimisë historike dhe kulturore të Republikës së Kosovës, që të jetë i qasshëm për hulumtim dhe studim nga studiues dhe hulumtues të ndryshëm. Në fund, ministri Gashi theksoi se “aktivitete të ngjashme, të rëndësishme jo vetëm për institucionet relevante por edhe për gjeneratat e reja, me theks të veçantë në fushën e hulumtimit e studimit por edhe të promovimit do të kenë gjithmonë mbështetjen institucionale, në ketë rast timen dhe të Ministrisë së Kulturës, Rinise dhe Sportit”. Ndërsa autori i saj, Afrim Ethemi, tha: “Të gjithë nganjëherë jemi në peshë para një udhëkryqi dhe gjëja e parë ishte një hartë. Janë disa ekzemplarë të hartave që dikujt ndoshta i kanë shërbyer për tu orientuar në atë udhëkryq. Këtu ekzistojnë disa kujtesa të të kaluarës për një popull i cili ende sot ballafaqohet me problemin e asaj ekzistence se ku kemi qenë dhe ku jemi, kush kemi qenë e kush jemi. U ofroj mundësinë të tjerëve ta gjejnë një rrugë e cila mund të na drejtojë apo të na japë një mundësi se kush jemi”. Në hapjen e kësaj ekspozite, pjesëmarrës ishin edhe dekani i Fakultetit Filozofik, Bujar Dugolli dhe shumë profesorë të cilët koleksionin e hartave të vjetra e vlerësuan si shumë të rëndësishme dhe si një pasuri të paçmuar historike.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara