Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputetët, të cilët kanë fituar mandatet gjatë zgjedhjeve të fundit parlamentare të mbajtura më 6 tetor, kanë mbajtur seancën konstituive të Kuvendit të Kosovës. Sipas rendit të ditës, në këtë seancë u zgjidhen organet e reja të kuvendit, kryetari, pesë nënkryetarët dhe u caktuan grupet parlamentare. Por, konstituimi i Kuvendit ishte vënë në pikëpyetje pasi që dy partitë që synojnë formimin e qeverisë, Lëvizja Vetëvendosje dhe Lidhja Demokratike e Kosovës, nuk kanë arritur ta finalizojnë marrëveshjen për koalicionin qeverisës.
Deri në zgjedhjen e kryetarit të kuvendit, seanca është drejtuar nga deputeti më i vjetër, Jahja Koka dhe deputetja më e re, Fjolla Ujkani, të dy deputetë nga Lëvizja Vetëvendosje. Fillimisht është formuar Komisioni i përkohshëm për verifikimin e mandatit të deputetëve. Pasi që ky komision i verifikoi mandatet, deputetët kanë dhënë betimin sipas ligjit dhe Kushtetutës. Deputetët e Kuvendit të Kosovës, kanë votuar pro zgjedhjes së Glauk Konjufcës, kryetar i Kuvendit të Kosovës me 75 për, 27 kundër, 6 abstenime. Ndërkohë janë zgjedhur edhe nënkryetarët e Kuvendit. Lëvizja Vetëvendosje ka propozuar Arberie Nagavcin për nënkryetare të Kuvendit të Kosovës, LDK ka propozuar Kujtim Gashin, si dhe PDK ka propozuar Memli Krasniqin. Të tre deputetët kanë marrë votat e mjaftueshme për të qenë nënkryetar të Kuvendit të Kosovës. Pas kësaj pjese të seancës kryetari i Kuvendit, Glauk Konjufca falënderoi për besimin që iu ka dhënë dhe shpalli të përfunduar seancën konstituive të Kuvendit të Kosovës.
