Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Jam fije bari e bimur n´këto troje
jam gjuha shqipe e dheut amtar
në zemër kam të dashurën Kosovë
në shpirt e kam të lashtën Çamëri!..
Atdhe, thirri ata që ty s´të kanë humbur
thirri të mblidhen në qytete dhe fshatra
thirre shkencën, artin, dhe univerzitetet
të krijojmë Bashkimin për Shqipërinë
Nuk ka rehati pa u bashkuar shqiptarët
nuk ka rehati pa i rikthyer tokat tona
nuk ka rehati pa lumturi të shqiptarve
gjuha na do të jemi të zotët e vendit
Të rënët e tëra kohërave na thërrasin
ç´po bëjmë ne të gjallët e tashëm
pse kjo heshtje e turpshme ndaj vetes
mos heshtja na ka vrarë e shkërmoqur
Të tashmit që kundërshtojnë bashkimin
do të ikin n´Hadhé, të harruar me turp
Çamëria e Bashkuar s´ka zëvendësim
për 13 mijëvjet, jam Jugu i Shqipërisë
Zgjohu Shqipëri! Zgjohu Shkup i Ilirisë
fol nëna ime e përgjakur; jam Çamëria
një revolucioni i yni është i nevojshëm
Një revolucion shqiptar për bashkim!..
Poezi nga dorëshkrimet, prill, 2016
Rrustem Geci: Lirinë e Kosovës nuk ka burg që e nxë
(Ese për librin e shkrimtarit, Kadri Rexhaj, “Pikëtakime letrare”)
Shkrimtari, publicisti, dhe ish i burgosuri politik, veprimtari dhe patriot i radhëve të para për çlirimin e Kosovës, Kadri Rexhaj, këto ditë doli me libër të ri, „Pikëtakime letrare“. Me këtë libër të eseistikës moderne shqiptare, shkrimtari Kadri Rexhaj, e begaton letërsinë tonë të bukur me një vepër të mirëfilltë letrare. Veçanti të librit, „Pikëtakime letrare“ janë; stili i shkrimit, estetika e kuptimeve, dramaturgjia e përgatitjeve dhe përmbajtja e veprimit për luftën finale. Esetë e shkrimtarit Kadri Rexhaj, janë mesazhe veprimi dhe kulturimi. Ku fshihet e vërteta, se të pa vërtetës në Kosovë po i biem grushte në fytyrë.
Rruste, jam i dashuruar i së bukurës, shprehet poeti Rexhaj. Poetikë e kam kokën, shpirtin dhe zemrën. Kosovë, shprehet Kadri Rexhaj, unë i kam dy të dashur të mishit dhe të gjakut tim; Atdheun dhe motrën e tij, Lirinë. Pa këta dy të dashur të shpirtit dhe të mendjes sime, mua do më merrej goja, dhe do të më zihej fryma…Ky libër i botuar nga Radio Kosova e Lirë, i bën nderë edhe botuesit, lexuesit, po edhe opinionit krijues shqiptar. Libri i Kadri Rexhajt, „Pikëtakime letrare“, shtrihet në një hapësirë shkrimesh në 64 ese. Në këtë libër gjeografia e atdheut tonë, hapet përmes krijuesve të vullnetit kryengritës të shqiptarëve për liri, pavarësi, dhe bashkim kombëtar. Që në faqen e parë të librit me ese, „Pikëtakime letrare“, shkrimtari Kadri Rexhaj, zëshëm shpalon dashurinë e tij për artin, për letërsinë, dhe përcaktimin e vetes së tij në betejat Kuq e Zi të kësaj jete.
Për një popull qytetërues si ky i yni, pushtimi ishte poshtërim i rëndë. Prandaj, gishti në këmbëz për Çlirimin e Kosovës ishte i nevojshëm dhe i domosdoshëm. Shkrimet e mia shprehet shkrimtari Rexhaj, para se t´i realizojë si art, i kam konceptuar dhe artikuluar si porosi, thirrje, mobilizim…Unë kujtoj shprehet autori i librit „Pikëtakime letrare“, se me arsim të mirëfilltë gjeopolitik, dhe historik, shqiptarët do të jenë në udhë të mbarë që t´i rikthejnë tokat e pushtuara nga fqinjët.
Fjala kryengritëse në letërsi është ndërgjegje e shkrimtarit, muziktarit, piktorit, artistit, dhe ndërgjegje e gjithë patriotëve që përfshihen në luftën për çlirim. Libri i Kadri Rexhës, „Pikëtakime letrare“, është përmbledhje esesh, që nga De Rada i madh e deri tek shkrimtari i zëshëm i Luftës Çlirimtare të Kosovës, Ahmet Qeriqi.
Kadri Rexhaj u lind me 7 shkurt 1949, në Cercë të Burimit. Është magjistër i shkencave filologjike, dhe anëtar i Lidhjes së Shkrimtarëve të Kosovës. Veprimtaria krijuese dhe patriotike e shkrimtarit Kadri Rexhaj është e gjerë dhe me taban kombëtar. Shkrimtari Kadri Rexhaj, deri më tash ka botuar këto vepra; 1 . Kosovë, gurrë e bardhë, 2 . Fati i luleve ( monografi për Jusuf Gërvallën ), 3 . Pushkë lajmëtare ( monografi për Edmond Hoxhën ) 4 . Dervish Shaqa ( monografi ), 5 . Pikëtakime letrare, dhe 6. Thirrjet e kohës.
Në këtë libër autori na sjell një portretizim të krijuesve shqiptar. Bardhësia shpirtërore e poetëve shqiptar hetohet edhe në vargjet me plagë betejash dhe luftërash. Nuk ka shkronjë shqipe që nuk është përballur me armikun pushtues, dhe me djemtë e lirisë së burgosur. Libri i Kadri Rexhajt, „Pikëtakime letrare“, i takon llojit të eseistikës kryengritëse.
Në çdo betejë shkruan autori, fjala dhe flamuri ishin të parat. Fjala kryengritëse e brezit të autorit Rexhaj, ishte nevojë dhe domosdoshmëri, për të zgjuar masën milionshe të popullit tonë kundër pushtuesit serb.
Gjërat që kanë ngrohtësinë e diellit unë i pëlqej shumë shkruan shkrimtari Kadri Rexhaj. Unë kudo e ndiej këtë tokë, pëshpërimat dhe dhimbjet e saj. Në shpirtin tim prej shkrimtari unë kurrë si kam bërë strehë marrëzisë. Jeta pa dashurinë e atdheut për mua është e zbrazët dhe e pakuptimtë. Pa idenë krijuese të bashkimit, çdo gjë do mbetet e vogël dhe midis vogëlimave.
Nuk mjafton të jesh nën hije, e të bëhesh shkrimtar. Jeta nën pushtues do që ta bësh dorën grusht. Ambient lufte dhe kryengritjesh ishte e tërë jeta ime dhe e brezit tim shprehet shkrimtari, Kadri Rexhaj. I frymëzuar nga betejat e poemave të shkrimtarëve të rilindasve tanë, Kadri Rexhaj, në librin „Pikëtakime letrare“, na e jep një peizazh mbresëlënës të letërsisë sonë të bukur. Me kujdes i kam lexuar ëndrrat e mia, ujqërinë e fqinjit armik, të tashmen time të ardhshme, dhe të kaluarën time të tashme.
I frymëzuar nga motivet e popullit kryengritës, si dhe nga betejat e poemave të shkrimtarëve dhe të rapsodëve tanë më të shkëlqyer, me librin „Pikëtakime letrare“, shkrimtari Kadri Rexhaj, na e ka dhënë një dimension të veçantë letrar dhe një tablo me peizazh ndezës të letërsisë sonë të bukur. Uroj autorin Kadri Rexhaj, për këtë libër të mrekullueshëm. Sukses i nderuari shkrimtar!
