Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Të rinj të moshës shkollore, autoritete komunale të Ferizajt, përfaqësues të KRU “Bifurkacioni” dhe të Institutit Rajonal të Shëndetësisë Publike, shënuan sot simbolikisht, me disa aktivitete, Ditën botërore të ujërave.
Kryetari i Komunës së Ferizajt, Muharrem Svarqa, drejtori i KRU “Bifurkacioni, Nazif Asllani, drejtues të IRSHP Sylejman Topalli, Minire Reçica e të tjerë, u folën të rinjve për nevojën e kujdesit ndaj burimeve ujore, si kujdes për vetë jetët tona.
Me këtë rast u tha se kapacitetet përpunuese të ujit në Ferizaj aktualisht janë 180 deri 200 litra për sekondë, 80 për qind e popullatës furnizohet me ujë nga rrjetet e ujësjellësve rreth 20 orë në ditë, se vetëm gjysma e puseve janë të cilësisë që mund të përdoren për nevoja familjare etj.
Nxënësit e pranishëm u interesuan të mësojnë hollësisht për kapacitetet ujore të komunës së Ferizajt, përse ka reduktime të ujit, çfarë është cilësia e ujit që e përdorim në shtëpi, sa janë humbjet e ujit, me çfarë tubacioni vjen uji në krojet e konsumatorëve, sa gjobiten keqpërdoruesit e ujit etj.
Zyrtarë të KRU “Bifurkacioni” dhe të IRSHP shpjeguan se as burimet aktuale ujore, as kapacitetet përpunuese, nuk i mbulojnë të gjitha nevojat e qytetarëve, por po bëhen përpjekje që gjatë viteve të ardhshme të gjenden burime të reja dhe të ndërtohen objekte përpunuese. Ata pohuan se uji i ujësjellësve është i cilësisë së mirë dhe kontrollohet vazhdimisht.
Autoritetet komunale dhe zyrtarët që merren me furnizim me ujë ose me kontrollin e tij, u bënë thirrje edhe një herë qytetarëve që ta kenë kujdes ujin, ta çmojnë dhe ta ruajnë si pasuri të pazëvendësueshme.
Të rinjtë pjesëmarrës u shpërndanë qytetarëve informacione për nevojën e kujdesit ndaj ujërave. Ata vizituan edhe fabrikën e ujit në Pleshinë.
