Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Përderisa pionieri i Millosheviqit, Ivica Daçiq dhe bashkëpunëtori numër një i Sheshelit, Aleksander Vuçiq demaskojnë bashkëkombësit e vetë se po bashkëpunojnë me shqiptarët, duke zbuluar vendndodhjet e viktimave shqiptare të kidnapuar e më pas të vrarë, të masakruar dhe të djegur në shkritoret e Serbisë, zyrtarët tanë në Kosovë shprehin jo mllefin e pezmin, por zhgënjimin e thellë në autoritetet e Serbisë. Të ndihesh i zhgënjyer, do të thotë t’i kesh besuar Qeverisë, në Beograd, se do të tregohej e matur, e penduar, korrekte, mirëkuptuese, bashkëpunuese, edhe pse kjo nuk ka ndodhur kurrë madje askurrë prej vitit 1999.
Zhgënjimi i zyrtarëve të lartë të vendit, nëse nuk është fjala për ndonjë lapsus të gazetarëve, apo zëdhënësit të qeverisë, me vërtetë është një deklaratë, për të cilën është pak të thuhet naive e qyqare. Të shprehesh zhgënjim nga dy, ne mesin e shumë shqiptarë-vrasësve serbë, do të thotë se ke harruar fare luftën dhe pasojat e saj. Natyrisht se në përbërjen e Qeverisë së sotme ka të tillë që “luftën e kanë kryer” duke mrizuar në Stankovec në Kukës dhe në vende të ndryshme të botës, por është fjala për ata zyrtarë të Qeverisë nga radhët e çlirimtarëve, të cilët zhgënjehen në paraqitjet publike të Vuçiqit e Daçiqit, pasi duket se kanë pritur tjetër qëndrim.
