Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministrja e Tregtisë dhe Industrisë, Hykmete Bajrami, mori pjesë në inaugurimin e panairit të turizmit, hotelerisë dhe gastronomisë “Travel 2016” i cili u hap të enjten në Prishtinë me pjesëmarrjen e ekspozuesve nga Kosova, Shqipëria, Mali i Zi, Maqedonia etj.
Në fjalën e saj, ministrja Bajrami tha se mbajtja e një panairi të tillë i cili i dedikohet sektorit të turizmit është zhvillim pozitiv i cili ua mundëson kompanive dhe operatorëve turistik nga Kosova të promovojnë produktet dhe shërbimet e tyre si dhe të rrisin nivelin e bashkëpunimit me homologët e tyre nga jashtë.
“Qeveria e Kosovës po punon me përkushtim në fuqizimin e sektorit të turizmit dhe rritjen e rolit të tij në zhvillimin ekonomik të vendit tonë. Kemi filluar me rishikimin e legjislacionit në fuqi, në mënyrë që të krijohet një ambient më i përshtatshëm për sektorin privat dhe këtu hyn edhe draftimi i Ligjit të ri të Turizmit, në të cilin po punohet, i cili ligj parasheh forcimin e kapaciteteve institucionale të cilat do t’i japin dimension të ri dhe shtytje më të madhe zhvillimit të turizmit në vendin tonë”, tha në fjalën e saj, ministrja Bajrami.
Në fushën e hartimit të politikave turistike Kosova ka arritur marrëveshje me shtetet e rajonit, si me Shqipërinë dhe Republikën e Maqedonisë, ndërkaq me Slloveninë është nënshkruar marrëveshja për bashkëpunim në fushën e zhvillimit ekonomik, që përfshinë edhe turizmin. Qeveria po punon në rritjen e numrit të marrëveshjeve edhe me shtetet tjera të rajonit dhe më gjerë.
“Kosova po punon që sektori i turizmit të fuqizohet gjatë viteve vijuese dhe një nga synimet tona është edhe anëtarësimi në Organizatën Botërore të Turizmit të Kombeve të Bashkuara (UNWTO) e cila është njëra nga organizatat më të mëdha botërore në fushën e turizmit, e cila promovon turizmin si mjet për rritjen ekonomike, zhvillimin gjithëpërfshirës, qëndrueshmërinë e mjedisit dhe ofron udhëheqje dhe mbështetje për sektorin në avancimin e njohurive dhe politikave të turizmit në mbarë botën” tha ministrja Bajrami.
Për fund, ministrja Bajrami u zotua se Qeveria e Republikës së Kosovës do të vazhdojë të punojë me të gjithë partnerët vendor dhe të huaj në fuqizimin sa më të madh të këtij sektori dhe promovimin e vlerave turistike të Kosovës paralelisht me mbështetjen e projekteve që kanë për qëllim rritjen e ofertës turistike dhe përmirësimin e shërbimeve në mënyrë që vendi ynë të futet në hartën ndërkombëtare si një destinacion turistik konkurrues dhe i cili do t’i sjellë të mira ekonomisë së vendit.
Edicioni i 13-të i Panairit të Turizmit, Hotelierisë dhe Gastronomisë “Travel Fair 2016” që po mbahet në Pallatin e Rinisë në Prishtinë do të zgjas deri të premten në orën 18:00.
