Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Partisë Demokratike të Kosovës, Memli Krasniqi, i shoqëruar nga bashkëshortja e tij, Meliza, ka votuar sot në ora 11:00 në Shkollën Fillore “Hasan Prishtina”, nga ku i ka ftuar të gjithë qytetarët e Komunave ku po zhvillohet raundi i dytë i zgjedhjeve që të dalin e të votojnë për udhëheqësit e komunave të tyre. Ai u bëri thirrje qytetarëve të dalin sa më masivisht për të shfrytëzuar të drejtën e tyre për të votuar. “Edhe sot në këtë raund të dytë të Zgjedhjeve Lokale bashkë me Melizën votuam në Prishtinë, në Shkollën Fillore “Hasan Prishtina”, sepse besojmë që është obligim i të gjithëve. Pavarësisht se kush e ka vazhduar garën unë mendoj që qytetarët duhet të dalin në mënyrë sa më masive që të japin verdiktin e tyre se kush dëshirojnë që t’i udhëheqë në katër vitet e ardhshme. Kryetari i PDK-së theksoi se Zgjedhjet Lokale janë për qytetarët jo për politikanët duke shpresuar se sot do të jetë një ditë e shkëlqyeshme për demokracinë. “Meqë se e kam thënë gjatë gjithë fushatës, besoj fuqishëm se Zgjedhjet Lokale para së gjithash janë zgjedhje për qytetarët dhe jo për politikanët, andaj është tepër e rëndësishme që të kemi pjesëmarrje sa më të madhe të qytetarëve, në mënyrë që edhe mandatet që do t’i fitojnë kryetarët e komunave të jenë mandate që i kanë në fokus kërkesat, nevojat e qytetarëve dhe familjeve të tyre. Eshtë një ditë e bukur siç po shihet edhe pse jemi në vjeshtë dhe shpresoj që të jetë edhe një ditë e shkëlqyeshme për demokracinë në Kosovë. Ju uroj suksese të gjithëve dhe shpresojmë që prej këtu e tutje do të kemi vërtetë institucione lokale funksionale, të cilat do të bëjnë më të mirën për qytetarët tanë.”, përfundoi Krasniqi.
