Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Këshilli Gjyqësor i Kosovës (KGJK), ka mbajtur takimin e 279-të me radhë, nën udhëheqjen e Kryesuesit, Albert Zogaj, me ç’rast janë diskutuar dhe miratuar pikat sipas rendit të ditës.
Në fillim të këtij takimi, Kryesuesi Zogaj falënderoi Projektin e USAID – Drejtësia Komerciale, si partner serioz të KGJK-së, i cili ka mbështetur vazhdimisht implementimin e Ligjit për Gjykatën Komerciale.
Nga ana tjetër, Drejtori i Projektit të USAID – Drejtësia Komerciale, Christopher Thompson, tha se jemi krenar që bashkëpunojmë me KGJK-në dhe e vlerësojmë seriozitetin dhe profesionalizmin e Këshillit për ta funksionalizuar në kohë Gjykatën Komerciale.
“Jap zotimin e plotë se të gjitha aktivitetet e planifikuara do të koordinohen me partnerin tonë, Projektin e USAID – Drejtësia Komerciale si dhe do t’i trajtojmë me urgjencë të gjitha çështjet që dalin nga Ligji për Gjykatën Komerciale, si përgjegjësi të KGJK-së”, tha Kryesuesi Zogaj.
Këshilli aprovoi shpalljen e konkursit për kryetar të Gjykatës Komerciale, me ç’rast u caktua Komisioni vlerësues për intervistimin, vlerësimin si dhe rekomandimin e kandidatëve për pozitën kryetar të Gjykatës Komerciale.
Anëtarët e Këshillit aprovuan shpalljen e konkursit të brendshëm për katërmbëdhjetë (14) pozita të lira për gjyqtar në Gjykatën Komerciale, nga këto pozita nëntë (9) për gjyqtar në shkallën e parë dhe pesë (5) në shkallën e dytë. Nga këto dy nivele, nga një (1) pozitë do jetë e rezervuar për komunitetin jo shumicë.
