Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Këshilli Gjyqësor i Kosovës (KGJK), ka mbajtur takimin e 280-të me radhë, nën udhëheqjen e Kryesuesit, Albert Zogaj, me ç’rast janë diskutuar dhe miratuar pikat sipas rendit të ditës.
Takimi filloi me raportimin e Komisionerit për mbikëqyrjen e procesit të përgjimeve dhe komunikimeve, gjyqtari Agim Maliqi, me ç’rast u diskutuan punët dhe sfidat që ka hasur komisioneri në përmbushjen e misionit të tij gjatë vitin 2021.
Udhëheqësi i Departamentit Special në kuadër të Gjykatës së Apelit, gjyqtari Vaton Durguti dhe Udhëheqësi i Departamentit Special në kuadër të Gjykatës Themelore Prishtinë, gjyqtari Valon Kurtaj, shfletuan para anëtarëve të Këshillit raportin e punës të këtyre departamenteve si dhe diskutuan rreth punës së përgjithshme dhe sfidave me të cilat përballen.
Shefi i Zyrës për Teknologji Informative në Sekretariatin e KGJK-së, Fatmir Rexhepi, raportoi lidhur me zbatimin e vendimit KGJK.nr.424/2021 nga gjykatat, lidhur me dërgimin e ankesave në procedurë paraprake penale në Gjykatën e Apelit përmes Sistemit të Menaxhimit Informativ të Lëndëve (SMIL). Po ashtu, u diskutua rreth sfidave të paraqitura dhe aktiviteteve që janë ndërmarrë për zbatimin e këtij vendimi me ç’rast Këshilli kërkoi nga kryetarët dhe administratorët e gjykatave si dhe ndihmës administratorët e degëve të gjykatave që të zbatohet me përpikëri vendimi i KGJK-së. Gjithashtu, Këshilli kërkoi nga Shefi i Zyrës së IT-së që të monitoroj dhe të raportoj në KGJK për zbatimin e vendimit.
Anëtarët e Këshillit aprovuan Planin dhe Programin Vjetor të punës së Gjykatës Supreme të Republikës së Kosovës, i cili paraqet planet dhe programin e punës për vitin 2022, duke u fokusuar në caktimin e kolegjeve gjyqësore dhe punën e gjykatës rreth unifikimit të praktikës gjyqësore.
Këshilli miratoi ndryshimin e Planit vjetor të punës së Gjykatës Themelore në Gjakovë për vitin 2022, me numër AGJ.I.nr.51/2022.
Në vijim të këtij takimi, u miratua Strategjia e Komunikimit e Këshillit Gjyqësor të Kosovës 2022 – 2024, e cila ka për synim rritjen e besimit dhe mirëkuptimit të publikut, rritjen e ndërgjegjësimit të publikut për reformat në gjyqësor si dhe përmirësimin e koordinimit dhe komunikimit të brendshëm. Anëtarët miratuan edhe Planin e veprimit për zbatimin e kësaj strategjie.
U aprovua Udhëzuesi themelor i referimit për trupat para-hetuese dhe hetuese në kryerjen e hetimeve ne çështjet disiplinore gjyqësore, i cili ka për qëllim të jetë mjet praktik për përdorim nga Autoritetet Kompetente dhe Panelet Hetimore, të themeluara nga KGJK, për kryerjen e hetimeve në çështjet disiplinore gjyqësore.
Këshilli emëroi gjyqtaren Valbona Musliu – Selimaj nga Gjykata Themelore Prishtinë, në pozitën anëtare e Këshillit Drejtues të Akademisë së Drejtësisë, nga radhët e gjyqtarëve të gjykatave themelore.
Në fund, Këshilli vazhdoi takimin me një (1) pikë të mbyllur për themelimin e panelit për një (1) rast disiplinor, me ç’rast vendosi për suspendim me pagesë të gjyqtarit të Gjykatës së Apelit, Y.Sh.
