Debatohet me publikun rregullorja për  vullnetarizmin në komunën e Rahovecit

11/05/2016 Institucionet

Rregullorja për fuqizimin dhe promovimin e vullnetarizmit në komunën e Rahovecit i është nënshtruar një debati të gjerë me publikun. Me këtë rast në Rahovec, Krushë të Madhe dhe Ratkoc janë zhvilluar debate me të rinj  dhe grupe të ndryshme të interesit që merren me angazhime vullnetare në kuadër të shoqërisë civile.

Drejtori i Drejtorisë për Kulturë, Rini dhe Sport Gardalin Shtavica, duke folur për rëndësinë e miratimit të kësaj rregulloreje, tha se aktualisht shumë të rinj e të reja angazhohen në punë vullnetare, mirëpo tani e tutje puna e tyre do të jetë e evidentuar dhe e vlerësuar. Rregullorja do të shërbejë për të stimuluar vullnetarizmin në komunën e Rahovecit, si dhe do të ndikojë që në këto aktivitete të përfshihen sa më shumë të rinj e të reja në punë vullnetare.

Qemajl Krasniqi, shef i sektorit për Rini dhe Sport shpalosi nene të veçanta të Rregullores, duke informuar për dobinë që ka komuniteti nga puna vullnetare dhe përfitimet e vetë vullnetarëve.

Zana Morina-Zllanoga, zyrtare në qendrën rinore “S.H.L-Kosova” potencoi faktin se angazhimi në punë vullnetare i disa të rinjve ju ka ndihmuar atyre që të zgjedhin një profesion dhe të sigurojnë bursa e mbështetje të ndryshme në formimin e tyre intelektual. Ndër të tjera Morina-Zllanoga ftoi të rinjtë e të rejat që të frekuentojnë qendrën rinore, si dhe të stimulojnë idetë kreative të tyre.

Sead Raba, zyrtar i OSBE-së, tha se kjo Rregullore është hartuar edhe me ndihmën e OSBE-së dhe qëllimi ka qenë që të nxitet puna vullnetare, të normohet çdo aktivitet vullnetar, ndërsa kontributdhënësit të stimulohen për angazhimin e tyre në të mirë të publikut.

Në debat ka kontribuuar edhe Enis Berisha, aktivist i shoqërisë civile, i cili foli për përvojat e tij shumëvjeçare në angazhime të ndryshme vullnetare, duke potencuar faktin se puna vullnetare është gjithmonë e dobishme për komunitetin. Aksione të ndryshme janë organizuar dhe përfitimet kanë më të mëdha se sa angazhimet, prandaj ftojmë të rinjtë që të organizohen dhe të zhvillojnë aftësitë e tyre në fusha të ndryshme të jetës shoqërore.

Debate janë organizuar edhe në qendrën rinore në Krushë të Madhe dhe në shtëpinë e kulturës në Ratkoc, ku kanë marrë pjesë numër i konsiderueshëm i të rinjve. Vërejtjet dhe sugjerimet e dëgjuara në këto debate do të inkorporohen në dokumentin final, që do të dërgohet për miratim në mbledhjen e radhës të Kuvendit të Komunës.

Debatet janë organizuar nga DKRS, Qendra Rinore, OSBE dhe grupet e shoqërisë civile në Rahovec, Krushë të Madhe dhe Ratkoc.

Të interesuarit mund të kontribuojnë në plotësimin e kësaj rregulloreje duke e shfletuar atë në faqen zyrtare të Komunës së Rahovecit, duke dërguar komente në DKRS, zyrën e OSBE-së.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara