Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në seancën e sotme në Gjykatën Themelore në Prishtinë, kryetari i Kuvendit të Kosovës, Glauk Konjufca, i cili po akuzohet se në gusht të vitit 2016 në cilësinë e deputetit ka hedhur gaz lotsjellës në sallën e Kuvendit dhe ka penguar personat zyrtarë në kryerjen e detyrave zyrtare, tha se veprimi ka qenë politik dhe se pretendon që nuk ka përdorur kurrfarë arme, nuk i ka bërë dëm askujt dhe se s’kishte qëllim të tillë. Lidhur me veprën penale “Pengimi i personit zyrtar gjatë kryerjes së detyrave zyrtare”, ai thotë se nuk ka qenë pengesë fort serioze, po ka qenë një shtyrje veç 30 minuta e mbledhjes se kryesisë së Kuvendit, prandaj nga gjithë këto që i thashë nuk më duket se janë vepra penale serioze”, deklaroi Konjufca. Prokurorja Rukije Shashivari, në fjalën hyrëse deklaroi se i pandehuri Konjufca ka kryer veprat penale të cilat i vihen në barrë sipas aktakuzës. “Gjatë këtij shqyrtimi gjyqësor do të vërtetohet kjo në bazë të dëgjimit të dëshmitarëve Adem Grabovci, Ismet Beqiri, Sabri Hamiti, Pal Lekaj, Valdete Bajrami dhe Slobodan Petroviq”, tha prokurorja. Pasi dëshmitarët nuk ishin të pranishëm, seanca e sotme u ndërpre, ndërsa e radhës u caktua më 22 korrik 2022. Prokuroria Themelore në Prishtinë, qysh më 3 shkurt 2017, ka ngritur aktakuzë kundër Glauk Konjufcës, dhe disa aktivistëve të tjerë të vetëvendosjes, tani në krye të Shtetit, të cilët ngarkohen për vepra penale. Konjufca akuzohet se ka kryer veprën penale, “Pengimi i personit zyrtar gjatë kryerjes së detyrave zyrtare” parashikuar nga neni 409, paragrafi 1 të Kodit Penal, vepër e cila dënohet me burg prej tre muaj deri në tri vjet. (Betimi për Drejetësi)
