Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot u njoftua se më 30 korrik 2022 paska pushuar së rrahuri zemra e një miku të madh të shqiptarëve dhe kauzës së shenjtë shqiptare për çlirim e bashkim kombëtar, avokati dhe gjykatësi zviceran, Roland Wiprächtiger.
Në përpjekjet titanike të popullit tonë për çlirim, gjithmonë kishim miq e aleatë që na përkrahnin, anise ata ishin të paktë. Një mik i tillë i madh i shqiptarëve ishte dhe mbeti deri në frymën e fundit Rolandi, ai i cili që nga gushti i vitit 1981, e sidomos nga pranvera e vitit 1982, ishte një nga mbështetësit dhe ndihmësit e fortë të shqiptarëve në Zvicër, e sidomos i veprimtarëve shqiptarë në Zvicër. I bindur në kauzën tonë të drejtë kombëtare, na përkrahu e ndihmoi pa rezerva. Jo rastësisht në dosjen e tij të pastër tek organet e sigurisë së shtetit zviceran gjendet vetëm aktiviteti i tij në ndihmë të Lëvizjes sonë Kombëtare. Që nga viti 1982 e tutje, janë të shumta lejet e demonstrimit nëpër rrugët e Gjenevës dhe Zürich-ut e që mbajnë emrin e Roland Wiprächtiger.
Ai i ndihmoi edhe shumë veprimtarë të çështjes sonë kombëtare, duke i përfaqësuar ata në lëndët e ndryshme gjyqësore, fillimisht si avokat dhe notar, ndërsa nga viti 1996 edhe si gjykatës në Gjyqin Kantonal të Luzern-it. Ai ishte njëri nga themeluesit e Shoqatës së Miqësisë Zvicerano-Shqiptare “Shota”. Së fundmi ishte anëtar i Kuvendit Shqiptar në Zvicër, ku dha një kontribut të çmueshëm në mbrojtjen e të drejtave të komunitetit shqiptar në Zvicër.
Me zell ai mësoi gjuhën shqipe, duke komunikuar me shqiptarë me ëndje në gjuhën shqipe. Zyra e tij ishte e “dekoruar” me shumë fletëza të varura në muret e saja me foljet e zgjedhura dhe lakimin e emrave shqip. Ai lexonte shqip dhe ndihmonte shumëkend edhe në përkthimin e materialeve politike nga shqipja në gjermanisht. Në dhomën e tij të gjumit mbante të varur në mur një hartë të zmadhuar të Kosovës, të cilën e deshi pa asnjë interes.
Pushimet e tija verore të shumtën e herave i kaloi në Gjilan, në shtëpinë e veprimtarit të çështjes kombëtare Qamil Isufi, ku ai ndjehej si në shtëpinë e vet dhe Qamilin e konsideronte si vëlla.
Roland Wiprächtiger do ngelet për gjatë kohë në kujtesën e shumë veprimtarëve të çështjes kombëtare, të cilët patën rastin ta njohin nga afër, si një njeri me kulturë të gjerë, i dashur dhe përkushtuar në përpjekjet tona për liri e pavarësi.
Ceremonia dhe shërbimi funeral i trupit pa jetë të mikut tonë të madh, Roland Wiprächtiger, do të bëhet më 19 gusht 2022 në kishën St. Michael në Luzern, duke filluar nga ora 11:00.
Lamtumirë miku ynë i madh Roland Wiprächtiger. Prehu në paqë miku im.
Agim Sylejmani
