Mbahet kampingu pranveror ,,Llanishti 2016”

23/05/2016 Institucionet

Me organizim të Shoqatës së Bjeshkatarëve Alpinistë “Guri i Shtrenjtë” nga Shtimja, në mbrëmjen e së shtunës, në ambientet e ish-shkollës së fshatit Llanishtë, janë mbledhur alpinistë nga treva të ndryshme të Kosovës, Lugina e Preshevës, Maqedonia e tjerë. Në fshatin Llanishtë që shtrihet rrëzë shpatijeve të Sharrit, me lartësi mbidetare prej 932 metra, për të përcjellur nga afër këtë aktivitet, ishin prezent edhe zëvendësministri i Ministrisë së Infrastrukturës, z. Fehmi Mujota, kryetari i komunës së Shtimes, z. Naim Ismajli, nënkryetari i Komunës, z. Fatmir Rashiti, kryesuesi i Kuvendit, z. Rrahman Jakupi dhe zyrtarë tjerë.

Hapjen solemne të Kampingut “Llanishti 2016” e bëri z. Faton Imeri, anëtar i Kryesisë së Shoqatës së Bjeshkatarëve Alpinistë “Guri i Shtrenjtë”. Ndërkaq, këtë kamping pranveror me një fjalë rasti e përshëndeti kryetari i Shtimes Naim Ismajli, i cili tha: “Është një rast i veçantë që ky aktivitet, tash ka filluar të bëhet tradicional dhe shumë popullor, i cili po mbledh njerëz anekënd viseve shqiptare. Është një mundësi e mirë e njohjes, në këtë rast jo vetëm të njohim njëri-tjetrin dhe të ofrohemi në komunikim por duke shtegtuar viseve dhe bjeshkëve tona po i njohim bukuritë që i ka Kosova me gjithë trevat tjera shqiptare. Ne në vazhdimësi do të përpiqemi si institucione të jemi përkrah jush, me qëllimin që ky aktivitet, të jetë sa më mirë i organizuar, të ketë kuptimin e vet të organizimit edhe pse e dimë që ndihmat ndonjëherë janë modeste por të paktën atë modesti apo atë përkrahje ne që e bëjmë për ju, dëshirojmë që të bartim mesazhin që ky aktivitet, ky angazhim i juaj, kjo punë e juaj të respektohet nga ne dhe të respektohet nga e gjithë shoqëria”, tha ndër të tjera Ismajli. Në këtë takim pati fjalë përshëndetëse edhe nga Kryesia e Shoqatës së Bjeshkatarëve Alpinistë “Guri i Shtrenjtë” , pastaj  kryetari i Federatës së Bjeshkatarëve Alpinistë të Kosovës, z. Ejup Maxhera, nënkryetari i FBAK-së, z. Osman Goranci dhe përfaqësues të shoqatave simotra.

Për të argëtuar të pranishmit janë përkujdesur valltarët e Ansamblit të Këngëve dhe Valleve “Dita” së bashku me këngëtarin shtimjan, Sabit Seferi.

Të nesërmen (e diel), në orët e hershme të mëngjesit ka filluar marshuta e alpinistëve drejt pushtimit të Majës së Gurrethit dhe kthimi sërish në Llanishtë.

Ky kamping tashmë tradicional, ka për qëllim promovimin e turizmit malor në trevën e Shtimes, sensibilizimin e qytetarëve për ruajtjen e florës dhe faunës dhe mos dëmtimin e pyjeve. Ky aktivitet është mbështetur financiarisht nga Drejtoria për Kulturë, Rini dhe Sport.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara