Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetarja e Kuvendit të Shqipërisë, Lindita Nikolla, ua ka dërguar një letër kryeparlamentarëve të shteteve anëtare të Këshillit të Evropës lidhur me raportin e Dick Martyt, për të cilin shkruan se pretendimet për trafik të organeve njerëzore janë të pavërteta dhe të pabazuara. Në letrën dërguar kryeparlamentarëve të vendeve anëtare të KE-së, Nikolla kërkon korrigjimin e gabimit tragjik të bërë ndaj Shqipërisë dhe Kosovës, pasojat e të cilave, vazhdojnë të dëmtojnë rëndë dy vendet. Më 21 korrik 2022 Kuvendi i Shqipërisë miratoi Rezolutën “Mbi pabazueshmërinë e pretendimeve për trafikimin e paligjshëm të organeve njerëzore në Kosovë dhe Shqipëri.” Teksi i Rezolutës së Kuvendit të Shqipërisë iu dërgua autoriteteve dhe Asamblesë Parlamentare të Këshillit të Evropës më 12 gusht 2022. Në letrën e saj Kryekuvendarja e Shqipërisë Lindita Nikolla ka shkruar: Me anë të kësaj letre dëshiroj të sjell në vëmendjen Tuaj një çështje mjaft të rëndësishme që lidhet me drejtësinë dhe të drejtat e njeriut si vlera thelbësore të sistemit demokratik dhe të qytetërimit bashkëkohor, të cilat qëndrojnë në themelet e Këshillit të Evropës, ku të dy vendet tona janë anëtare. Bëhet fjalë për të drejtën e vendit tim, Shqipërisë, si edhe të Kosovës, për të rivendosur dinjitetin e nëpërkëmbur nga disa dyshime tërësisht të pabazuara dhe të pavërteta mbi trafikun e organeve njerëzore në Shqipëri e Kosovë, që pretendohet të jenë kryer nga liderët e Ushtrisë Çlirimtare të Kosovës, thuhet në letrën e kryekuvendares së Shqipërisë Lindita Nikolla.
