Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në këtë takim, në lidhje me zhvillimet partiake dhe punën ndërmjet dy mbledhjeve të Këshillit Drejtues, raportuan Kryesia e Partisë, Grupi Parlamentar, Rinia Demokratike e Kosovës dhe Komisioni për Organizimin e PDK-së në Mërgatë. Në këtë mbledhje u diskutua edhe për zhvillimet aktuale, me theks të veçantë për zhvillimet në pjesën veriore të Kosovës, dialogun dhe marrëveshjen gjithëpërfshirëse për normalizimin e marrëdhënieve ndërmjet Kosovës dhe Serbisë. Në fjalën e tij, Kryetari i Partisë Demokratike të Kosovës, Memli Krasniqi, tha se gjatë këtij viti Kosova është përballur me sfida dhe kriza të njëpasnjëshme në shumë drejtime, përfshirë energjinë, shëndetësinë, ekonominë, sigurinë, dialogun dhe diplomacinë. Kryetari Krasniqi, duke folur për situatën e krijuar në pjesën veriore të Kosovës, i bëri thirrje Qeverisë që të reagojë menjëherë dhe të heq barrikadat. “Qeveria duhet të jetë vigjilente dhe të reagojë sa më shpejtë për të hequr barrikadat të cilat janë kthyer në punkte të Vuçiqit, si tentim për ndarjen e Kosovës”, tha ai.
Kreu i PDK-së i bëri thirrje Qeverisë që t’i largojë barrikadat në pjesën veriore dhe për këtë tha se ka mbështetjen e plotë. Ai tha se qytetarët kanë votuar për Qeveri që e qeverisë krejt Kosovën e jo vetëm deri tek ura e Ibrit. Ndërkaq, në lidhje me dialogun Kosovë – Serbi, Kryetari Krasniqi tha se PDK tashmë i ka bërë publike pesë pikat kryesore, të cilat duhet të jenë shtylla të marrëveshjes finale me Serbinë. “Ruajtja e karakterit unitar të shtetit të Kosovës sipas rregullimit aktual kushtetues; njohja formale nga pesë shtetet mosnjohëse të BE-së; nisja e procesit të anëtarësimit në NATO përmes pjesëmarrjes në “Partneritet për Paqe” si hap i parë; marrja e statusit të shtetit kandidat për anëtarësim në BE dhe njohja e ndërsjellë – duhet të jenë shtyllat bazë të kësaj marrëveshjeje”, tha Kryetari Krasniqi.
Në lidhje me raportin e Kryesisë së Partisë, Sekretari i Përgjithshëm i PDK-së, Bajrush Xhemaili, tha se gjatë vitit 2022, Kryesia ka zhvilluar një agjendë të hapur edhe përmes komunikimit të qëndrimeve të veta ndaj zhvillimeve politike, në së paku tre drejtime.
“Ballafaqimi i pushtetit me papërgjegjësinë dhe paaftësinë e qeverisjes, degradimi i jetës sociale, ekonomike dhe politike në vend, si dhe parashtrimi i alternativave me propozime konkrete, siç ka ndodhur me rekomandimet për inflacionin, gjendjen ekonomike, dialogun, dhe çështjet tjera të rëndësishme”, ka thënë sekretari Xhemaili.
Abelard Tahiri, Kryetar i Grupit Parlamentar të Partisë Demokratike të Kosovës, ka thënë se Grupi i deputetëve të PDK-së është koherent, aktiv dhe ka agjendë konkrete.
“Grupi Parlamentar i Partisë Demokratike të Kosovës, përmes angazhimit politik në Kuvend, ka arritur në masë të madhe që ta ushtrojë agjendën e vet brenda Kuvendit të Kosovës përmes debateve parlamentare, iniciativave ligjore dhe ballafaqimit politik me mazhorancën dhe qeverinë Kurti, duke demaskuar veprimet politike të qeverisë në dëm të agjendës shtetërore dhe degradimit institucional, keqpërdorimeve dhe paaftësisë së saj për të ushtruar përgjegjësi në qeverisje konform ligjit, interesave të shtetit dhe nevojave të qytetarëve”, ka thënë Tahiri.
Për punën e Rinisë Demokratike të Kosovës, Kryetari Donjet Bislimi ka thënë se përkushtimi ka qenë i jashtëzakonshëm për të fuqizuar rininë.
“Që nga marrja e mandatit, Rinia Demokratike e Kosovës, në bashkëpunim të plotë me strukturat e saj Qendrore dhe të Degëve, ka zhvilluar aktivitete të shumta, përmbi 450, të iniciuara nga strukturat qendrore të rinisë, dhe me numër rekord aktivitetesh të organizuara dhe implementuara nga degët, por që bashkë tejkalojnë numrin katërshifror”, ka thënë Bislimi.
Ndërkaq, në fund, në lidhje me punën e jashtëzakonshme që është bërë gjatë vitit 2022, në Mërgatë, nga Komisioni për Organizimin e PDK-së në Mërgatë, foli Kryesuesi Elmi Reçica.
“Komisioni për Organizimin e Partisë Demokratike të Kosovës në Mërgatë përgjatë vitit 2022 ka zhvilluar shumë aktivitete, takime e diskutime, mbledhje e tubime. Fokusi i punës së këtij Komisioni natyrisht që ka qenë dhe mbetet strukturimi në mërgatë, respektivisht formimi i Degëve dhe Nëndegëve të Partisë Demokratike nëpër shtetet ku jetojnë dhe veprojnë bashkatdhetarët tanë”, ka thënë Kryesuesi i Komisionit, Elmi Reçica.
Në mesin e të arriturave u përmendën takimet, themelimi i degëve dhe rrjetëzimi në Suedi, Zvicër, Gjermani, Francë, Itali etj., si dhe organizimi i Javës së Mërgatës në Kosovë.
Në fund të kësaj mbledhjeje, Kryetari Krasniqi dhe të gjithë të pranishmit uruan qytetarët e Republikës së Kosovës për festat e fundvitit, me dëshirën që viti 2023 t’ju sjell më shumë harmoni dhe begati në jetën e tyre.
