Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryeministri i Shqipërisë, Edi Rama, ka reaguar lidhur me një prononcim të Sekretarit të Përgjithshëm të OKB-së, Antonio Guterres në lidhje me marrëveshjen mes Kosovës dhe Serbisë, i cili e ka quajtur “Marrëveshja mes Beogradit dhe Prishtinës”. Edi Rama shtron pyetjen nëse përdorimi i termave me emrat e kryeqyteteve, dhe jo të shteteve, është gabim serioz, apo lapsus. Emri zyrtar i saj është Marrëveshja për normalizimin e marrëdhënieve mes Kosovës dhe Serbisë. Do të ishte e papranueshme, nëse Sekretari i Përgjithshëm nuk do ta përdorte qëllimisht emërtimin e duhur. Ju lutem jepni sqarime sa më parë, shkruan Rama. Në OKB lidhur me takimin në Ohër mes kryeministrit të Kosovës Albin Kurti dhe kryetarit serb Aleksandër Vuçiç, u tha se Sekretari i Përgjithshëm mirëpret lajmin e BE-së për marrëveshjen nga palët në rrugën e normalizimit të marrëdhënieve ndërmjet Beogradit dhe Prishtinës. Tani është e rëndësishme që të dyja palët të punojnë me shpejtësi dhe mirëbesim për të realizuar të gjitha detyrimet e përcaktuara në marrëveshje. Kombet e Bashkuara janë të përkushtuara për të mbështetur zbatimin e marrëveshjeve, që rrjedhin nga dialogu Beograd-Prishtinë i ndërmjetësuar nga Bashkimi Evropian. Pavarësisht reagimit të Edi Ramës, OKB-ja nuk e njeh Kosovën si shtet të pavarur, sepse ende mbështetet në rezolutën 1244 të Këshillit të Sigurimit të OKB-së, e cila ia njeh Serbisë sovranitetin mbi Kosovën.
