Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Adem Ukëhaxhaj lindi me 15 prill të vitit 1964 në fshatin Carrabreg të Komunës së Deçanit nga prindërit Zeqir dhe Ajnishahe Ukëhaxhaj, te cilët sollën në jetë bijtë e bijat: Ademin, Samiun, Mirjeten, Hikmeten, Aliun, Fitneten dhe Luljeten.
Shkollën fillore e të mesme i kreu, në Deçan, pastaj shkollën e mesme ushtarake e kreu në Sarajevë, me sukses të shkëlqyeshëm.
Në vitin 1982 emërohet rreshter, në Manastir të Maqedonisë ku punoi dy vjet. Pastaj regjistrohet në Akademinë Ushtarake, në Beograd, në degën e Këmbësorisë, të cilën e kreu me afat rekord me notë mesatare 9. 8. Në shtator të vitit 1987 merr gradën e nëntogerit dhe caktohet të punoj në Brçko, një vit më vonë avancohet në Toger ndërsa pas dy vitesh në gradën e Kapitenit.
Në vitin 1985, ashtu sikur edhe disa eprorë të tjerë të Armatës Jugosllave, Ademi paraburgoset në Sarajevë ndërsa gjykimi u bë në Lubjanë. Gjatë gjykimit Ademi u mbrojtë në gjuhën amtare. Falë zgjuarsisë Ademi u lirua nga aktakuza si i pafajshëm dhe vazhdoi punën deri në vitin 1991 kur e lëshoi punën dhe u kthye në Kosovë.
Ademi ka marrë pjesë në demonstrata, protesta dhe shumë aktiviteteve tjera në Deçan, të cilat organizoheshin kundër pushtuesit serb.
Me krismat e para të luftëtarëve të lirisë, në Dukagjin, ai u angazhua në Ushtrinë Çlirimtare të Kosovës dhe emërohet Komandant i fshatit Carrabreg me 25 Maj 1998.
Për herë të parë në fshatin Carrabreg i ka furnizuar UÇK-në, me armatim.
Me vendim të Shtabit të Zonës Operative të Dukagjinit, emërohet komandant i rajonit të Vokshit ku përfshiheshin disa fshatra, të cilat Ademi, si ushtarak me përvojë përcaktonte edhe strategjinë e luftës. Po ashtu ka stërvitur shumë djem të ri nëpër shumë fshatra të Komunës së Deçanit si në Carrabreg, Preljep, Hulaj, Voksh, Baballoq, e vende të tjera, ku ka dhenë kontribut të çmuar.
Ka qenë pjesëtar i Brigadës 134 “Jusuf Gervalla” në Zonën Operative të Dukagjinit. Bashkëluftëtarët e ngushtë të strategut Adem Ukëhaxhaj, ishin Ahmet Krasniqi, Sali Çeku, Saim Tahiraj, Xajë Qelaj, Asim Ukëhaxhaj, Bashkim Ramosaj, Milazim Ukëhaxhaj e shumë të tjerë.
Më 2 qershor të vitit 1998, mori në gjoks plumb snajperi, derisa ndodhej në fshatin e lindjes në Carrabreg, afër shkollës fillore në lagjen e Qorrajve. Në momentin e plagosjes ishte komandant i Zonës së Vokshit dhe Rekës së Keqe. Përkundër përpjekjeve të mjekëve në spitalin ushtarak, në Irzniq, për t ia shpëtuar jetën plumbi gjakatar serb e kishte marr keq, andaj Ademi nuk mbijetoi.
Bashkëluftëtarët e kanë varrosur me 3 qershor të vitit 1998 në fshatin Irzniq, kurse është rivarrosur me 2 qershor të vitit 2000 në fshatin e tij, në Carrabreg.
Ademi pas vete ka lënë gruan Gjylën dhe fëmijët Mirandën, asokohe 9 vjeç, Melindën 6 vjeçe dhe Armendin 3 vjeç. Ai ka qenë i afërt dhe solidar me njerëzit, ishte humanitar, dhe kurdoherë në shërbim të atyre që ia kishin nevojën
Pas rënies i është ngritur përmendorja e përbashkët në fshatin e tij, në Carrabreg bashkë me emrat e dëshmorëve të tjerë të fshatit. Pas rënies është graduar nga gjeneral Ahmet Krasniqi si Komandant i klasit të parë dhe nga ish Presidentja e Kosovës zonja Atifete Jahjaga me titullin “Hero i Kosovës” në vitin 2016.
Ka shumë artikuj nëpër gazeta dhe revista që e kanë përshkruar jetën dhe veprimtarinë e Ademit, një ndër to është libri i Hasan Hasanit “Të pavdekshmit e Dukagjinit”.
Pasioni i Ademit ka qenë leximi, sporti dhe shëtitjet.
Ka shumë këngë dhe poezi që i janë kushtuar Ademit po ashtu Ademi ka poseduar edhe një ditar personal por që fatkeqësisht ka humb pas vdekjes
