Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Situata më e re politike në Kosovë, kur Albin Kurti madje edhe krekoset me qëndrimin e tij të hapur kundër Amerikës, nuk ka të bëjë me trimërinë e tij, sepse atë nuk e ka në gjene, as në intelekt, por mjerisht ka të bëjë me mbështetjen tash për tash të heshtur të Gjermanisë e Francës, të cilat kanë projektet e tyre të ndryshme për të ardhmen e Kosovës, në radhë të parë duke marrë si shembull bashkimin e dy Gjermanive që do të thotë bashkimin e Kosovës me Serbinë, pas 10 viteve. Ky nuk është projekt amerikan. Ky projekt ka dalë nga zyrat e pasardhësve të Bizmarkut dhe ato të konferencave të Versajes e të Londrës. Pa një siguri të tillë, nga qarqe të besueshme të këtyre shteteve, Albin Kurti nuk do të guxonte të pipëtinte kundër amerikanëve, jo më ta fyejë e ta quajë naiv dhe të padijshëm përfaqësuesin e Departamentit Amerikan të Shtetit, Anthony Blinken.
Fakti se Gjermania e Franca nuk po e qortojnë Kurtin është mjaft domethënës. Për më tepër, Anglia edhe pse me rezervë, po e merr në mbrojtje.
Edhe pse Franca, Gjermania dhe Anglia parimisht e kanë përkrahur dhe e përkrahin pavarësinë e Kosovës, këto tri shtete kanë raporte shumë më të mira politike, tregtare ekonomike me Serbinë, sesa me Kosovën, pavarësisht se Beogradi zyrtar hapur e ka bërë me dije se nuk do të vendos sanksione kundër Rusisë, për shkak të pushtimit të një pjese të Ukrainës. Edhe fakti tjetër se NATO-ja mori nga Turqia një kontingjent të madh të forcave ushtarake, ka të bëjë me një plan të ri për të ardhmen e Kosovës. Forcat turke në vendin tonë, që janë në kuadër të NATO-s, nuk i kundërshton Serbia por as Rusia, natyrisht se nuk i kundërshton Kosova dhe as Shqipëria. Turqia në këtë rast konsiderohet si një ndërmjetës i pranuar nga të gjithë, ashtu sikur po e luan rolin e ndërmjetësit edhe në mes të Rusisë dhe Ukrainës.
Pavarësisht kalkulimeve të ndryshme, Kosova dhe shqiptarët përgjithësisht në trojet e tyre në Ballkan nuk mund të kenë paqe as prosperitet pa Shtetet e Bashkuara të Amerikës, pasi Amerika në momentet kyçe historike ka qenë në mbrojtje të Shqipërisë, të Kosovës dhe të shqiptarëve përgjithësisht.
Forcat liridashëse të Kosovës, veteranët e Ushtrisë Çlirimtare të Kosovës, duhet ta përkrahin fuqishëm mocionin e kryetarit të AAK-së, Ramush Haradinaj, Komandantit të Dukagjinit të kohës së Luftës sonë Çlirimtare dhe fitimtare, për ta rrëzuar Qeverinë Kurti, e cila po bart mbi vete një papërgjegjësi të madhe historike, që mund të shkaktojë një tragjedi të re në Kosovë dhe përgjithësisht në Ballkan, sepse Rusia i frikësohet Amerikës dhe aspak Gjermanisë e Francës, e krejt pak Anglisë.
Një papërgjegjësi po kaq të madhe kanë edhe dy partitë e mëdha opozitare, PDK e LDK, të cilat lavdërojnë e përbetohen për Amerikën, por kanë zgjedhur të bëjnë spektatorin e situatës, të pasigurt për finishin e Albin Kurtit e të Vetëvendosjes. Ato sikur presin që Kurti të japë dorëheqje, apo ta rrëzojë dikush tjetër, në mënyrë që vetë mos lagën fare. (RKL)
