Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kombëtarja shqiptare arriti fitore historike në përballjen e saj përfundimtare me Rumaninë. Në një atmosferë të jashtëzakonshme të krijuar nga mijëra e mijëra tifozë kuqezi që mbushën shkallët e stadiumit të Lionit, Kombëtarja jonë me një fitore minimale e dërgoi skuadrën rumune në shtëpi, duke e diskualifikuar atë nga gara. Lojëtarët tanë treguan një lojë cilësore, të ndërtuar bukur e me mundësi të mira shënimi. Pas një harkimi të gjatë nga Ledian Memushaj, në minutën e 43-të, sulmuesi Armando Sadiku me një goditje me kokë tund rrjetën rumune, duke shënuar golin e parë dhe të vetëm në ndeshje. Edhe pjesa e dytë u shqua nga dominimi i djemve tanë, të cilët vunë në vështirësi mbrojtjen rumune. Vlerësimet më të larta për formën dhe performancën e tij i mori mbrojtësi i Kombëtares, Arlind Ajeti, i cili e shndërroi repartin e mbrojtjes në një barrierë të pakapërcyeshme për kundërshtarët. Edhe Migjen Basha, Amir Abrashi dhe Ledian Memushaj patën paraqitje të jashtëzakonshme, duke i dhënë impulse lojës së Kombëtares. Fitorja e mbrëmshme në Lion i rrit gjasat që Kombëtarja shqiptare të vazhdojë garën edhe në fazën tjetër. Sidoqoftë, gjithçka do të varet nga loja e skuadrave të tjera dhe plasmani i tyre.
