Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Nisma për të Drejtën e Pronës (NDP)- PIAKOS, ka organizuar aksionin simbolik: PRONA JOTE, TË DREJTAT E TUA, për fuqizimin e gruas në të drejtën e pronës. Përmes këtij aksioni simbolik të realizuar në qytetin e Prishtinës dhe Graçanicës, NDP synon të nxisë ndryshimin e qëndrueshëm në terren përmes veprimit kolektiv, dhe avokimin me bazë në komunitet mbi rëndësinë e bartjes dhe regjistrimit të pronës.
Përgjatë ditës së 8 marsit, vullnetarë të projektit kanë takuar drejtpërsëdrejti gra të grupmoshave të ndryshme, për të shpërndarë broshurat informuese e lule, dhe për të komunikuar mbi rëndësinë e regjistrimit të pronës, dhe rolin e avancimit të të drejtave pronësore në fuqizimin e gruas.
Avancimi i të drejtave pronësore, sigurimi i të drejtës për pronësi, dhe regjistrimi i pronës së paluajtshme në emër të grave, do të ndihmojë gratë të kapërcejnë barrierat dhe pabarazitë ekzistuese, duke u ofruar atyre rol të barabartë në familje e në shoqëri. Përfitimet socio-ekonomike nga të drejtat pronësore për gratë janë të shumta, e në përgjithësi fuqizojnë pozitën e gruas në shoqëri.
Aksioni i sotëm është realizuar në bashkëpunim me Ndërmarrjen Publike Trafiku Urban në Prishtinë. Ky bashkëpunim ndërinstitucional i projektit PIAKOS, me institucionet dhe akterët e rëndësishëm në vend, do të vazhdoje edhe më tutje me aktivitete të tjera.
Nisma për të Drejtën e Pronës (NDP), PIAKOS, në vijim do të ndihmojë gratë, të rinjtë, e grupet e margjinalizuara, që të kenë qasjen në informacion, të drejtat pronësore, dhe resurset e duhura për tu bërë pronarë të pronës së paluajtshme, dhe për të përfituar nga të drejtat pronësore.
Projekti mbështetet nga Banka Botërore, Fondi për Paqe e Shtet-Ndërtim dhe implementohet nga Qendra e Trajnimeve dhe e Burimeve për Avokim (ATRC).
