Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasadori i SHBA-së në Prishtinë, Jeff Hovenier, thotë se marrëdhëniet mes Kosovës dhe SHBA-së po përballen me mosmarrëveshje lidhur me vendimet politike të qeverisë së Kosovës dhe shpërfilljen e këshillave amerikane për komunitetin serb.
Në një intervistë me Zërin e Amerikës, Hovenier thekson se dallimet mes SHBA-së dhe qeverisë së kryeministrit Albin Kurti lidhen me frymën dhe pasojat konkrete të veprimeve, jo me anën ligjore të tyre. Ai kërkon nga qeveria e Kosovës të bashkëpunojë me Uashingtonin dhe aleatët perëndimorë.
“Presim që qeveria e Kosovës të punojë ngushtë me ne për të adresuar shqetësimet e qytetarëve serbë, duke respektuar dinjitetin dhe sigurinë e tyre, dhe për të avancuar një shtet sovran, shumë-etnik dhe demokratik,” tha ambasadori.
Duke folur për shpronësimin e tokave në veri, Hovenier theksoi se dallimet nuk lidhen me ligjshmërinë, por me mënyrën e zbatimit të ligjit. Ai nënvizoi rëndësinë e ndjeshmërisë ndaj komunitetit dhe nevojën për komunikim të plotë.
“Në të gjitha shoqëritë demokratike, shpronësimi është zgjidhje e fundit dhe ndodh në rrethana të skajshme. Në veri të Kosovës, ku tensionet janë të ngritura, duhet kujdes i veçantë për ndjeshmëritë e komunitetit,” tha ai.
Ai përfundoi duke thënë se SHBA dhe partnerët ndërkombëtarë kanë rezerva për mënyrën e zbatimit të shpronësimeve dhe kanë diskutuar me qeverinë e Kosovës për këtë çështje.
