leoni

U mbajt nata e parë e edicionit të nëntë të festivalit folklorik “Oda e Llapushës” në Komunën e Malishevës

02/08/2024 Institucionet

Mbrëmë në Komunën e Malishevës nisi edicioni i nëntë i festivalit tradicional të folklorit “Oda e Llapushës” , nën përkujdesjen e kryetarit të komunës, Ekrem Kastrati. Ky festival, i cili ka për qëllim ruajtjen dhe kultivimin e trashëgimisë kulturore shqiptare, mblodhi së bashku grupe, ansamble, shoqëri, dhe rapsodë nga të gjitha trojet shqiptare. Në ceremoninë e hapjes, kryetari Kastrati theksoi rëndësinë e festivalit në promovimin e kulturës dhe traditës vendase. Ai përgëzoi pjesëmarrësit dhe u uroi suksese në këtë festival garues, i cili njëkohësisht nxjerr në pah pasurinë kulturore të Malishevës. Kryetari nënvizoi se Malisheva ka qenë gjithmonë një vatër e rapsodisë dhe muzikës tradicionale, duke prodhuar emra të njohur si Salih e Feriz Krasniqi, Sefë Mleqani, dhe legjendën e muzikës, “Bilbili i Kosovës”, Nexhmije Pagarusha dhe shumë e shumë emra të tjerë, deri në ditët e sotme. Ngjarja u pasurua edhe me praninë e qytetarëve të nderit të sapo shpallur të Malishevës: David Carr, anëtar i Këshillit të shtetit të New York-ut, Charles D. Fall, anëtar i Asamblesë së shtetit të New York-ut, dhe veprimtari i njohur Naser Nika. Ata përshëndetën të pranishmit dhe vlerësuan rëndësinë e festivalit si një platformë për promovimin e vlerave kulturore. Gjithashtu, ata shprehën gatishmërinë për të thelluar bashkëpunimin mes Malishevës dhe shtetit të New York-ut, duke paralajmëruar edhe binjakëzimin me një nga qytetet e këtij shteti. Gjatë natës së parë të festivalit, u prezantuan 14 grupe dhe rapsodë me pikat e tyre artistike. Sonte do të mbahet nata e dytë dhe finale, ku juria profesionale, e përbërë nga Prof. Dr. Zymer Neziri, Prof. Dr. Adem Zejnullahu, dhe koreografi Haki Mullqi, do të vlerësojë performancat sipas rregullave të festivalit. Çmimet kryesore të festivalit përfshijnë çmimin “Salih e Feriz Krasniqi”, si dhe çmime të tjera, përfshi çmimi për debutantin më të ri, çmimi i diasporës e ai i publikut. Ky festival vazhdon të jetë një ngjarje kyçe për ruajtjen dhe promovimin e kulturës tradicionale shqiptare, duke sjellë bashkë pjesëmarrës dhe dashamirës të folklorit nga të gjitha anët.

Kontrolloni gjithashtu

39 pemëtar ferizajas përfitues të spërkatsëve profesionale

Mbështetja për bujqit dhe fermerët ferizajas po vazhdon. Në kuadër të skemës mbështetëse për bujqit …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara