Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Qeveria Kurti është përballur me një situatë të paprecedentë pas skadimit të mandateve të të gjitha pozitave të larta në administratën publike që janë drejtuar nga ushtrues detyre. Sipas Ligjit për Zyrtarët Publikë, mandati i këtyre ushtruesve ka përfunduar, duke shkaktuar një bllokadë në funksionimin e institucioneve shtetërore. Ligji në fjalë, i cili ka hyrë në fuqi më 25 shtator të vitit të kaluar, parashikon që askush nuk mund të ushtrojë një detyrë për më shumë se një vit. Kjo ka bërë që prej ditës së djeshme, shumë pozita kyçe në administratë, përfshirë edhe atë të Drejtorit të Përgjithshëm të Thesarit, të mbesin të paplotësuara, duke rrezikuar ekzekutimin e pagave për rreth 80 mijë zyrtarë publikë dhe skemat sociale për muajin shtator. Opozita dhe shoqëria civile kanë kritikuar vazhdimisht Qeverinë Kurti për varësinë e saj nga ushtruesit e detyrës në pozita kyçe.
