Kryetari i Komunës së Vitisë Sokol Haliti dhe Kryesuesi i Kuvendit Komunal, z. Bekim Azizi kanë uruar qytetarët vitias me rastin e festës së 28 Nëntorit, Ditës së Pavarësisë së Republikës së Shqipërisë dhe Ditës së Flamurit Kombëtar. Në urimin e kryetarit Haliti thuhet:
Të nderuar qytetarë të Komunës së Vitisë dhe bashkëkombës shqiptarë kudo që ndodheni!
Në këtë prag të shënimit të 28 Nëntorit – Ditës së Pavarësisë së Republikës së Shqipërisë dhe Ditës së Flamurit Kombëtar, kam nderin t’ju përcjell urimet më të sinqerta dhe më të përzemërta.
Kjo ditë e shenjtë kombëtare është simbol i lirisë dhe krenarisë sonë që na bashkon si komb dhe na kujton sakrificat dhe vendosmërinë e të parëve tanë për liri dhe pavarësi. Poashtu kjo ditë është frymëzim dhe udhërrëfyes që forcon lidhjet tona shpirtërore e historike.
Në kuadër të kësaj feste të madhe, Komuna e Vitisë, në bashkëpunim me Drejtorinë për Kulturë, Rini dhe Sport, ka organizuar një program të pasur aktivitetesh, të cilat kanë nisur tashmë dhe atë me mbajtjen e orës së parë mësimore në të gjitha shkollat e komunës sonë ku do të flitet mbi këtë ditë të rëndësishme. Aktivitetet do të vazhdojnë deri më 28 Nëntor.
Fillimisht Kuvendi Komunal i Vitisë me 28 nëntor nga ora 9:30 do ta mbajmë një seancë solemne kushtuar kësaj dite dhe më pas në ora 10:00 do të bëhen homazhe në varrezat e dëshmorëve në Viti.
Aktivitetet do të vazhdojnë në Stadiumin në Sadovinë të Jerlive dhe atë në mes të SH.F “Kosova” me SH.F “Kumanova”.
Përmbyllja e këtyre aktiviteteve do të jetë po këtë ditë me koncerti festiv që do filloj nga ora 16:00, në Shtëpinë e Kulturës “Gursel e Bajram Sylejmani” në Viti.
Ju ftoj që së bashku ta kremtojmë këtë festë kombëtare.
Urime 28 Nëntorin!
Zoti e bekoftë kombin shqiptar dhe shqiptarët kudo që ndodhen.
Sinqerisht
Sokol Haliti
Kryetar i Komunës së Vitisë
Në urimin e Kryesuesit të Kuvendit Komunal të Vitisë, z. Bekim Azizi thuhet:
Të dashur qytetarë të Vitisë,
Gëzuar 28 Nëntorin! Kjo ditë është një përkujtim i lavdisë dhe krenarisë së kombit tonë. Le të nderojmë sakrificat e paraardhësve dhe të punojmë për një shoqëri më të fortë dhe më të bashkuar.
Nëntori është muaji i festave tek shqiptarët duke filluar nga Skënderbeu, Ismail Qemaili dhe Adem Jashari e duke u kurorzuar me UÇK-në.
Festat e tilla duhet të jenë momente reflektimi e unifikimi kombëtar për ta bërë më të mirën për kombin e për tu angazhuar secili për një të ardhme më të mirë duke mos harruar të kaluarën e lavdishme.
Gëzuar 28 Nëntorin
Sinqerisht,
I juaji,
Bekim Azizi
Kryesues i Kuvendit Komunal të Vitisë!
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
