Njoftim nga Kryetari i komunës së Vitisë, Sokol Haliti rreth objektit të ri shkollor në Pozheran dhe çerdhes publike në Drobesh

08/01/2025 Institucionet

Kryetari i Komunës së Vitisë, z. Sokol Haliti ka reaguar lidhur me anulimin e Ministres së MASHT-it e cila gjatë ditës ka anuluar vizitën në Viti për inaugurimin e Shkollës “Halil Alidema” në Pozheran dhe të çërdhes publike në Drobesh.

Në reagimin e kryetarit Haliti thuhet:

Të nderuar qytetarë të komunës së Vitisë

Me qëllim të informimit të drejtë dhe transparent, dua t’ju njoftoj lidhur me projektin e objektit të ri të shkollës fillore të mesme të ulët “Halil Alidema” në Pozheran dhe të çërdhes publike në Drobesh.

Komuna e Vitisë, përmes një shkrese zyrtare më datë 06.01.2025, rreth orës 15:34, është njoftuar nga Ministria e Arsimit se përurimi i objektit të Sh.F.M.U. “Halil Alidema” në Pozheran dhe i çerdhes publike në Drobesh do të bëhet më datë 08.01.2025, me fillim në orën 10:00.

Me këtë rast, unë si kryetar i komunës, i shoqëruar nga inxhinierët komunalë, kam vizituar këto objekte dhe nga inxhinierët është konstatuar se akoma ishin duke u zhvilluar punime. Më pas, si kryetar i komunës së Vitisë, unë kam njoftuar Ministrinë e Arsimit rreth punimeve të papërfunduara, dhe ata janë pajtuar që përurimi i këtyre objekteve të bëhet pasi të përfundojnë punimet.

Gjithashtu, si kërkesë e imja e vazhdueshme ka qenë që punimet e mbetura të finalizohen sa më parë, që objekti të pranohet teknikisht dhe që nxënësit e këtij vendbanimi të vendosen në bankat shkollore me orar të plotë. Po ashtu, vlen të përmendet që punimet në këtë objekt shkollor kanë filluar që nga viti 2016.

Ndërkaq, lidhur me çerdhen publike në Drobesh të Vitisë, e cila është financuar me buxhetin komunal, ju njoftojmë se do të zhvillohen procedurat e rekrutimit dhe pranimit në punë të stafit përkatës, me qëllim që filizat e rinj t’i pranojmë sa më parë në këtë çerdhe publike.

Sinqerisht

Sokol Haliti

Kryetar i komunës së Vitisë

Kontrolloni gjithashtu

Prishtina pritet të pozicionohet si një qendër inovacioni teknologjik global

Kryetari i komunës së Prishtinës, z. Përparim Rama është shprehur i lumtur që rinia jonë …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2025, Të gjitha të drejtat e rezervuara