Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Papunësia vazhdon të mbetet fenomen me shumë brenga për shoqërinë e vendit tonë, si dhe sfidë e përhershme për institucionet e Kosovës. Sipas shifrave zyrtare të Ministrisë së Punës, tregu i punës në Kosovë vazhdon të jetë në gjendje më të rëndë krahasuar me të gjitha vendet e Ballkanit Perëndimor. Zyrtarisht papunësia thuhet se është 32.9 për qind, kurse sipas shifrave të përfaqësuesve të punëtorëve, thuhet se niveli i papunësisë është mbi 45 për qind. Për të përmirësuar tregun e punës në vend, autoritetet kompetente vazhdimisht kanë kërkuar nga të papunët që të paraqiten në zyrat e punësimit, të cilat funksionojnë në kuadër të Ministrisë së Punës dhe Mirëqenies Sociale. Numri i përgjithshëm i të regjistruarve në këto zyra, është rreth një qind e dyzet mijë punëkërkues, ndërsa rreth tetë mijë është numri i punëkërkuesve me nivel të lartë të arsimimit. Por, të pa shpresë nga mundësia e gjetjes së një vendi të lirë të punës nga regjistrimi në këto zyra, jo të gjithë të papunët kanë vendosur emrat në këto lista. Sipas rezultateve të anketës së fuqisë punëtore për vitin 2015, publikuar në muajin qershor të këtij viti, nga Agjencia e Statistikave të Kosovës, thuhet se dy të tretat e popullsisë së Kosovës nga 15 deri në 64 vjeç, është në moshë pune.
