Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Lëvizja Vetëvendosje ka hedhur dyshime për hetime të drejta dhe transparente në rastin e vdekjes së Astrit Deharit në burgun e Prizrenit. Këto dyshime sipas sekretarit organizativ Dardan Molliqaj nisin që nga dita e parë kur drejtori i Policisë në Prizren Nexhnmi Krasniqi doli e tha se Astrit Dehari ka vdekur si pasojë e përdorimit të medikamenteve. Për Vetëvendosjen është e pamundur që kjo strukturë e hetimeve të marrë pjesë në zbardhjen e rastit. “Kjo është arsye thelbësore pse familja dhe Vetëvendosja nuk besojnë që duhet të bëhet përmes mjekoligjorëve pa pjesëmarrjen e ndërkombëtarëve. Jemi të brengosur me administrimin e provave pa prezencën e mjekësisë së pavarur”, tha Molliqaj në një konferencë për media.
Në këtë konferencë janë lëshuar edhe përgjimet e rastit të Adem Grabovcit ku në njërën nga to përmendet edhe emërimi i Sylë Hoxhës që aktualisht është kryeprokuror i Prokurorisë Themelore në Prizren. Nuk mund t’i besojnë këtij njeriu që është emëruar nga politika. Molliqaj ka folur edhe për vizitën e tij që ia ka bërë të ndjerit Dehari derisa sa ishte në paraburgim. Më 27 tetor e ka vizituar Deharin dhe kjo nuk është e fshehtë. Molliqaj tha se vizita e tij nuk ka qenë e fshehtë dhe se vizita është realizuar me lejen e gjyqtarit, Vehbi Kashtanjeva. Ky i fundit dje për media ka mohuar se ka pasur kërkesë nga Molliqaj dhe Sami Kurteshi për ta vizituar Deharin në burg. Astrit Dehari ka vdekur të shtunën që shkoi më 5 nëntor 2016 në rrethana ende të paqarta në burgun e Prizrenit.
