Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Lëvizjes për Shqipëri të Bashkuar, Tahir Veliu përmes një postimi në Facebook ka reaguar ashpër, ndaj deklaratës së kryetarit të tifozëve “Dardanët”, Lulzim Berisha, i cili paturpësisht deklaroi se “Kosova nuk është Shqipëri e as Serbi, Kosova është Kosovë.”
Parulla “Kosovo is Kosovo” është parullë anti-shqiptare, në shërbim të projekteve pansllaviste dhe politikës shoviniste serbe. Deklaratat të tilla, nga mercenarë të kësaj klase politike të çorientuar dhe servile nuk i shërbejnë interesave kombëtare. Tendenca e krijimit të kombit “kosovar” është tendencë për tjetërsimin e shqiptarëve dhe mbi këtë bazë është devijim i aspiratës shekullore për bashkim kombëtar të shqiptarëve, aspiratë kjo e sanksionuar edhe në betimin e ushtarëve të Ushtrisë Çlirimtare të Kosovës.
Përpjekjet e vazhdueshme të qarqeve të ndryshme të mirë financuara, për krijimin e një identiteti të ri “kosovar” janë vazhdimësi e projekteve pansllaviste për asimilimin e shqiptarëve. Këto projekte shoviniste, populli shqiptar i Kosovës vazhdimisht i ka kundërshtuar, luftuar dhe i ka hedhur në koshin e plehrave, prandaj edhe ju do të dështoni, ashtu siç kanë dështuar të gjitha projektet shoviniste të armiqve të jashtëm.
Shpallja e Pavarësisë së Republikës së Kosovës, si fazë e përkohshme është në synim të qëllimit përfundimtar për Shqipëri të Bashkuar. Kosova është dhe përjetësisht do të jetë Shqipëri. Kushdo që ka guximin të deklaroi ndryshe, drejtëpërdrejtë i shërben qarqeve shoviniste serbe dhe parullës së tyre tashmë të gërrditshme se kinse “Kosova është Serbi”. Deshqiptarizimi dhe mohimi i identitetit shqiptar të Kosovës më së miri i shërben politikës shekullore serbe.
Lëvizja për Shqipëri të Bashkuar kërkon nga federatat sportive të dy shteteve shqiptare, që mënjeherë të fillojnë procedurat ligjore për krijimin e ligave të përbashkëta mbarëkombëtare për të gjitha sportet.
