Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Diaspora nga Kosova anë e kënd botës e kështu edhe bashkatdhetarët që jetojnë në Zvicër, kanë dhënë gjithmonë një kontribut të jashtëzakonshëm, për lirinë dhe pavarësinë e Kosovës si dhe për të gjitha zhvillimet historike të disa dekadave të fundit në Kosovë. Diaspora ka ndihmuar që të mbahet gjallë fryma e rezistencës edhe kur represioni i shtetit serb dhe jugosllav, tentonte ta rrënojë identitetin shqiptar të shumicës së popullsisë në Kosovë.
Diaspora kosovare ishte gjithmonë një mbështetje e fortë logjistike dhe financiare e lëvizjes paqësore të viteve 90. Me kontributin e tyre, nëpërmjet Fondit 3% e mundësuan në masë të madhe refuzimin që kosovarët i bënë shtetit serb dhe vënien e themeleve të pavarësisë së vendit. Diaspora kosovare ishte frymëzuese dhe pjesëmarrëse direkte në krijimin e Ushtrisë Çlirimtare të Kosovës. Me fondin Vendlindja Thërret dhe me pjesëmarrjen aktive në luftën çlirimtare ndihmoi çlirimin e vendit.
Diaspora kosovare në vitet e pasluftës ndihmoi në masë të madhe në ndërtimin e vendit dhe me dërgesat financiare ofroi një ndihmë të madhe për mbijetesën e popullsisë në vendin e shkatërruar nga lufta. Pas pavarësisë së vendit shteti i Kosovës dhe të gjitha qeveritë e paspavarësisë pothuajse e harruan krejtësisht diasporën kosovare. Në vend që të shfytëzohet potenciali i madh që e ka diaspora jonë për zhvillimin ekonomik dhe për demokratizimin e vendit, shteti i Kosovës i la pasdore bashkatdhetarët që jetojnë jashtë vendit.
Diaspora aktualisht i ka mundësitë shumë të vogla të pjesëmarrjes në vendimarrje në vendin të cilit i kontriboi aq shumë. Derisa shumë kombe të botës ofrojnë vende të rezervuara në parlamentet e tyre për pjesëtarët e diasporës, në Kosovë edhe nëntë vite pas pavarësisë nuk ndodhë dhe as nuk bisedohet fare kjo temë.
Disa prej zgjedhjeve të fundit janë zhvilluar në një kohë shumë të shkurtër dhe nuk lanë mundësinë që diaspora të regjistrohet dhe të votojë dhe kështu të marrë pjesë në vendimarrjen, për fatin e vendit. Përgatitja e votimit jashtë vendit dhe sensibilizimi i bashkatdhetarëve që të marrin pjesë në zgjedhje deri tash ishte shumë i vogël.
Prandaj ftojmë qeverinë dhe organet e shtetit që të ofrojnë të gjitha mundësitë dhe lehtësimet që diaspora të ketë mundësinë në zgjedhet për Parlamentin e Kosovës.
Ftojmë bashkatdhetarët që ta shfrytëzojnë të drejtën dhe detyrimin qytetar që të marrin pjesë në zgjedhjen e përfaqësuesve, që do ta drejtojnë fatin e vendit.
Regjistrimin si votues mund ta bëni më së voni deri me 22. Maj 2017 duke plotësuar Formularin në Faqen e KQZ.
Këtu mund ta gjeni Formularin per regjistrim : http://www.kqz-ks.org/Uploads/Documents/1_lvjjbwbauk.pdf
Kuvendi i Shqiptarëve të Zvicrës
