Në Zllakuqan të Klinës u mbajt manifestim në 120- vjetorin e hapjes së shkollës së parë shqipe

13/10/2017 Institucionet

Në përkujdesje të kryetarit të Komunës së Klinës, Sokol Bashota, të premten në fshatin Zllakuqan të Klinës, është mbajtur manifestim për nder të 120- vjetorit të hapjes së shkollës së parë shqipe, ”Atë Shtjefën Gjeçovi”, në të cilin ka marrë pjesë edhe zëvendëskryeministri i Kosovës, Enver Hoxhaj, familjarë të dëshmoreve, përfaqësues të klerit katolik e mysliman, prindër, nxënës, arsimtarë, veteranë të arsimit dhe qytetarë të tjerë. “Zllakuqani dhe fshatrat përreth sot kanë festë dhe kjo festë është e përbashkët për të gjithë shqiptarët, sepse po shënojmë 120- vjetorin e shkollës së Zllakuqanit, të kësaj vatre me rëndësi historike dhe kombëtare, jo vetëm për Klinën dhe banorët e saj, por për krejt historikun dhe rrugëtimin e vështirë që bëri shkolla shqipe ndër vite dhe ndër shekuj për të kryer misionin e saj në shërbim të edukimit kombëtar të brezave të rinj dhe të zhvillimit të përgjithshëm të tyre shoqëror e shkencor”, ka thënë me ketë rast kryetari i Klinës, Sokol Bashota për të shtuar se ky aktivitet, tregon se pushteti lokal në Klinë nderon dhe çmon të gjitha përpjekjet që ka bërë populli ynë për liri, pavarësi dhe shkollë shqipe. Sipas Bashotës, figura e rrallë e Gjeçovit, është njëra nga figurat dhe personalitetet me poliedrike të kulturës shpirtërore të popullit shqiptar dhe luftës për liri. Zëvendëskryeministri i Kosovës, Enver Hoxhaj, para të pranishmëve të shumtë, ka thënë se kjo ditë është e veçantë për Zllakuqanin dhe Kosovën, sepse para 120 viteve, këtu është hapur një shkollë shqipe dhe kjo ka qenë një ngjarje e madhe dhe e veçantë që kujtohet edhe sot. “Janë plot 120 vjet, kjo tregon rrugën e gjatë që është bërë, që të krijohen dy shtete që sot janë në hartën e Ballkanit, duke kaluar sakrifica të shumta. Kjo ngjarje kujton të kaluarën tonë të lavdishme. Çdo gjeneratë ka një mision të saj, gjenerata e Gjeçovit ka kryer misionin e hapjes së shkollës shqipe”, tha Hoxhaj, për të shtuar se gurthemeli i kësaj shkolle para 120 vite është gurthemel i shtetit të Kosovës. Në këtë manifestim foli edhe shkrimtari e publicisti, Mikel Gojani dhe drejtori i shkollës Ndrecë Kola, të cilët vunë në pah rëndësinë e madhe që ka kjo datë për shkollën shqipe. U dha edhe një program artistik nga nxënësit e shkollës së Zllakuqanit ndërsa kryetari i Klinës Sokol Bashota ndau mirënjohje për disa personalitete për kontributin e dhënë në arsim, humanizëm dhe lirinë e Kosovës.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara