Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Komisioni Parlamentar për të Drejtat e Njeriut, Barazi Gjinore, për Persona dhe Peticione kanë vizituar sot Ministrinë për Forcën e Sigurisë së Kosovës ku mbajti takim me shefen e Njësisë për të Drejtat e Njeriut dhe Barazisë Gjinore në MFSK, Halime Morina si dhe me përfaqësueset femra të disa departamenteve të kësaj ministrie.
Ministri i FSK-së Rrustem Berisha theksoi se në MFSK i kushtohet rëndësi përfshirjes së femrave duke thënë se shkalla e përfshirjes është e kënaqshme. “Gjinia femërore në MFSK/FSK nuk është vetëm për plotësim të numrit, por përqindja e pjesëmarrjes së tyre përfaqëson peshën e saj në proceset vendimmarrëse të institucionit dhe na bën të ndihemi krenarë me punën e tyre si brenda ashtu edhe jashtë shtetit. Një pjesë e tyre i përkasin edhe të kaluarës së lavdishme-Ushtrisë Çlirimtare. Angazhimi jonë nuk do të mungojë as në të ardhmen për krijimin e ambientit të përshtatshëm të punës së femrave në institucionin tonë”, tha Berisha në fjalën përshëndetëse.
Nga ana e saj kryetarja e Komisionit parlamentar Duda Balje premtoi bashkëpunim dhe ndihmë profesionale e energji pozitive kurdo që është e nevojshme. Ndër të tjera ajo tha: “Do të punojmë për ju sa herë që keni nevojë për ndihmën tonë”.
Halime Morina prezantoi punën e Njësisë për të Drejtat e Njeriut dhe Barazi Gjinore në MFSK/FSK në raport me femrat e Ministrisë dhe Forcës, si dhe u diskutuan arritjet dhe sfidat për përfaqësimin e femrës në proceset vendimmarrëse dhe ngritjen e saj në karrierë. Nga të gjeturat e kësaj Njësie u tha që në MFSK/FSK nuk ka shkelje të të drejtave të njeriut dhe barazisë gjinore dhe se gjithçka është e rregulluar me ligjet e Republikës së Kosovës.
