Akademi komemorative për zyrtarin e Gjykatës dhe veteranin e UÇK-së Habib Morina

02/03/2018 Institucionet

Të premten është mbajtur Akademi komemorative për të kujtuar jetën dhe veprën e ndihmësadministratorit të Gjykatës Themelore, dega në Klinë dhe veteranit të UÇK-së, Habib Morina (1956) nga fshati Gllarevë i Klinës, i cili vdiq të enjten pas një sëmundje të shkurtër. Ai është varrosur në varrezat e Dëshmorëve të Kombit te “Kodra e Kuqe” në fshatin Grabanicë. I ndjeri Morina, me gjithë vëllezërit e tij, ishte radhitur me kohë në Ushtrinë Çlirimtare të Kosovës. Vëllai i tij, Mehedin Morina, erdhi nga Holanda e largët për të rënë në altarin e lirisë në luftë me forcat serbe në Komunën e Rahovecit. Kryetari i Komunës së Klinës, Zenun Elezaj, në ceremoninë e varrimit, tha se Habibi gjithë jetën e tij ia kushtoi kauzës për çlirimin e Kosovës dhe ndërtimit të institucioneve të Kosovës për një shtet ligjor.”Gjatë kohës së luftës, ka shtuar kryetari Elezaj, shtëpia e tij u bë bazë e Ushtrisë Çlirimtare të Kosovës. Fjalët, sikur vishen me dhimbjen për humbjen e këtij personaliteti të dalluar dhe luftëtari të denjë të UÇK-së. Tash e tutje do të ndjehet më të madhe mungesa për të. Kujtimet e mbajnë gjallë Njeriun, ndaj, do ta kujtojmë përgjithmonë”, ka thënë me këtë rast, kryetari Elezaj, I cili ka ngushëlluar familjen, farefisin e bashkëluftëtaret për vdekjen e hershme të Habibit. Kryetari i Gjykatës Themelore, dega në Klinë, Prekë Palushi, ka thënë se me mua dhe gjithë kolegët Habibi ka ndarë të keqen dhe të mirën. “U ka dalë në krah atyre që kanë pasur nevojë për ndihmën e tij sa herë që kjo ka qenë e nevojshme. Nuk ka përtuar. Nuk ka ndryshuar asnjëherë. Ka hyrë edhe vetë në secilën situatë të ndjeshme që punonjësit e institucionit tonë kanë mundur të përballen gjatë punës”, tha Palushi, sipas të cilit i ndjeri Habib Morina në vitet jo të shtyra të jetës, la vullnetin dhe përkushtimin më të madh për kujdesin ndaj familjes, përkushtimin ndaj punës dhe përpjekjet e pareshtura për kauzën kombëtare. Menjëherë pas çlirimit të vendit, më 1999, Habibi emërohet komandant i Policisë Ushtarake në Klinë. Me themelimin e Gjykatës komunale në Klinë, po ashtu në vitin 1999 angazhohet në këtë gjykatë në vendin e punës: ndihmës administrator derisa e gjeti vdekja”, ka pohuar ndër të tjera Palushi. Në emër të Shoqatave të luftës dhe familjes foli Zeqir Morina, i cili vlerësoi lartë figurën e Habib Morinës si luftëtar dhe si punëtor pas luftës.

Kontrolloni gjithashtu

Kuvendi komunal i Rahovecit mbajti mbledhjen e rregullt të njëmbëdhjetën për këtë vit kalendarik

Udhëhequr nga Kryesuesi – Arbër Zenuni, u mbajt seanca e muajit nëntor, e njëmbëdhjeta e …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2024, Të gjitha të drejtat e rezervuara