Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Arrestimi dhe deportimi i 6 shtetasve turq në Kosovë nga Policia e Kosovës që erdhi si rezultat i një bashkëpunimi ndërmjet AKI-së dhe Shërbimit Informativ Turk ngjalli reagime të ndryshme në mediat dhe politikën kosovare. Këto reagime të shoqërura me diskurs irracional, ishin një përpjekje për të ndërtuar atmosferë të paqenë armiqësie me shtetin turk, si anëtar i NATO-s, e cila mund të lexohet edhe si përpjekje për rrënim të afërsisë reciproke dhe përkahjes së shtetit turk ndaj Kosovës, që nga shpallja e Pavarësisë, shkëmbimi i përvojave institucionale shtetërore, ndihma ekonomike dhe logjistike, e deri te lobimi për pavarësinë dhe për anëtarësimin e Kosovës në organizatat ndërkombëtare. Kështu, në emër të mbrojtjes së individëve të një organizate të shpallur terroriste nga shteti turk, e cila i shkaktoi atij kërcënim me përmbysje të rendit kushtetutes e shoqëror turk përmes tankeve dhe aeroplanëve luftarakë të uzurpuar, po përpiqet të lëkundet dhe dobësohet skema e miqësisë tradicionale mes dy popujve dhe e bashkëpunimit të afërt reciprok insitucional ndërmjet Kosovës dhe Turqisë. E për faturën e trazimit të këtyre raporteve me shtetin turk si fuqi ekonomike, ushtarake dhe mik tradicional i yni, do të duhej që shoqëria kosovare të kërkojë shpagimin te ata liderë që nuk sillen me sens diplomatik e të matur. Më poshtë janë ngritur disa çështje mbi këtë debat të ngritur në Kosovë.
Media të tëra (të lidhura me grupe interesi të njohura e të dëshmuara me agjenda e diskurs antishqiptar) në shërbim 24 orësh për të prodhuar video-materiale dhe lajme propaganduese si dhe lëkundja e tërë hierarkisë shtëtërore (që nga presidenti, kryeministri, kryekuvendari, ministrat përkatës, drejtori i AKI-së e deri te partitë dhe zyrtarët tjerë publikë) kundër arrestimit dhe deportimit të 6 shtetasve turq, është dëshmia më e mirë për ta parë se çfarë ndikimi dhe tronditjeje mund të shkakojë lëvizja gyleniste në Kosovë. Ky tension para së gjithash shpërfaqi një të vërtetë: nëse për 6 persona të arrestuar e deportuar u ndërtua gjithë ky mobilizim irracional, çka do të ndodhte deri nesër në një situatë kur strukturat e kësaj lëvizjeje do të depërtonin edhe më thellë në hierarkinë shtetërore dhe në mjedisin mediatik e biznesor Kosovar? Çka nëse, pas disa vitesh, dekonspirohet një hierarki e fshehur brenda institucioneve tona jetike, e cila ndërtohet mbi diskurse antikushtetuese, terroriste e antishqitare, kur ata të jenë jo 6, por 60 e 600 sish? Duke u nisur nga ky këndvështrim, duhet parandaluar pa kompromis kërcënimi eventual i ndërhyrjes graduale të një sistemi të huaj parallel (siç është lëvizja gyleniste) që kërcënon rendin kushtetues dhe orientimin politik të Kosovës!
Ata që ankohen për deportimin e gylenistëve janë të gjithë pjesë e rrjetit të përfituesve financiar të Fetullah Gylen dhe mercenarë politikë, medial dhe të shoqërisë civile të paguar po nga FETO.
Rrjeti dhe metodologjia e Fetullah Gylen për të shtrirë ndikimin dhe kapur pushtetin përfshin dy lloj metodash:
Të krijojë njerëzit e tij në çdo fushë të ndikimit, ky formim përfshin edukimin dhe zhvillimin e njerëzve nga xhamitë, shoqatat, shkollat dhe studimet etj. por edhe të “blejë” të gatshëm njerëz që kanë pozitë, pushtet dhe influencë, kjo metodë përdoret aty ku nuk gjen tokë fertile për të parën, apo ku suksesi synohet të jetë i përshpejtuar.
Në Kosovë për shkak të traditës së fortë në strukturat e Bashkësisë Islame, në media, shoqëri civile dhe politikë, Gylenistët u fokusuan shumë edhe në metodën e dytë, ky fokus ishte vetëm për ta shkaktuar ndryshimin ngase edhe në metodën e parë vazhduan punën me intensitet të lartë por pa suksesin e dëshiruar.
Biznesmenët e mëdhenj të Kosovës, politikanët dhe personalitetet e ndryshme të shoqërisë civile që sot po ankohen për deportimin e 6 gylenistëve janë pjesë e rrethit të interesit dhe influencës së përbashkët që ka rrjeti i Gylenit në Kosovë. Rrjet i përbërë nga njerëz “të blerë” të cilët nuk i lidh asnjë lloj vlere, besimi, e as bindje fetare që ka Fetullah Gyleni. Vlerat dhe bindjet fetare, apo ideologjike të të gjithë ankuesve lehtë mund të verifikohen.
Ajo që Hashimi e përmendi në intervistën e tij, se deportime të ngjashme kanë ndodhur shumë edhe më herët por shqetësimet dhe reagimet nuk kanë qenë të tilla, është e vërtetë, institucionet e sigurisë dhe inteligjencës kanë depërtuar shumë figura, kanë arrestuar dhe u kanë refuzuar hyrjen dhjetëra e qindra personaliteteve dhe personave të ndryshëm. Shumica e tyre kanë qenë njerëz të botës islame. Por edhe pse të gjithë kanë qenë në dijeni se këto veprime institucionet e sipërpërmendura i kanë ndërmarrë pa procese gjyqësore, asnjëherë nuk kanë reaguar as faktori politik (pozitë/opozitë), as shoqëria civile as mediat e afërta me pushtetin edhe pse e kanë ditur, asnjëherë nuk kanë reaguar.
Ja një pjesë e skemës së aleatëve të FETO-s:
Gylenistët përmes “Institucionet Arsimore Gylistan”, pjesë e të cilit është edhe kolegji “Mehmet Akif” ju kanë ofruar shkollim falas shumicës së fëmijëve të elitës politike të nivelit qendror dhe lokal, poashtu edhe personaliteteve të shquara të shoqërisë civile dhe mediave. E habitshme është se edhe fëmijët e biznesmenëve më me ndikim në Kosovë i kanë përfunduar shkollimet ose vazhdojnë t’i vijojnë pa pagesë (me bursa herë të hapura e herë të fshehta, ku kolegji ua kthente paratë si dhuratë për kontributin që baballarët po jepnin për fondacionin) në këtë institucion. Janë ajo kategori e biznesmenëve që janë të lidhur me pushtetin dhe që përcaktojnë agjendat politike dhe ekonomike të qeverive të Kosovës. Duke pasur parasysh se kostoja financiare e shkollimit në këto institucione ka variuar nga diku 3000-5000EUR për vit, imagjinoni se cila ka qenë vlera financiare që familjet e politikanëve, atyre të SHC, të mediave dhe të bizneseve kanë mundur të përfitojnë nëse një fëmijë ka vijuar nga 3-12 vite shkollë në këto institucione.
Ajo që dihet është se ky institucion i ka vendosur kamera pa dijeninë e fëmijëve në çdo hapësirë, madje edhe në tualete edhe në dhomat e konvikteve. Gjirimi i sjelljeve intime, dhunës, skandaleve dhe vandalizmave të nxënësve ka qenë proces i vazhdueshëm. Ato asnjëherë nuk janë raportuar, madje sipas dëshmitarëve ato nuk raportoheshin as në institucione të sigurisë. Kjo më pas përdorej për t’i shantazhuar prindërit ose nxënësit bashkë me prindërit. Kjo është edhe arsyeja që qoj edhe Agjencionin për mbrojtjen e të dhënave personale që t’i bëj padi këtij institucioni dhe ta dënojë Gjykata Themelore në Prishtinë.
Për këtë i ftojmë mediat që të interesohen se cilët fëmijë të politikanëve, mediave, shoqërisë civile dhe bizneseve vijojnë ose kanë vijuar mësimet në këtë institucion, në këtë mënyrë kuptohet e tërë skema.
Bizneset turke në Kosovë janë të ndryshme, një pjesë e madhe e tyre janë të kapura nga grupi FETO, nga këto biznese kanë përfituar partitë politike dhe politikanë të caktuar. Këto biznese bëjnë evazion fiskal enorm (me dijeninë e zyrtarëve të korruptuar), bëjnë pastrim parash dhe gjithashtu janë financues të skemës së FETO-s në vend, rajon dhe botë.
Nga momenti kur dështoi puçi i FETO-s në Turqi, biznese të panumërta të grupit FETO kanë zbarkuar në Kosovë dhe nga kapitali i tyre ka përfituar skema e lidhur me pushtetin.
Bizneset e lidhura me Berat Buzhalën dhe kolegët e tij, kishin fituar shumicën e kontratave në ofrim të “shërbimeve” milionëshe për bizneset në Kosovë dhe në Shqipëri të lidhura me grupin FETO. Grupi KOHA dhe Gazeta Express qysh në vigjiliet e tyre kishin pranuar mbështetje të madhe financiare nga grupi i FETO-së dhe si mercenar mediatik kanë promovuar agjendën e FETOS. Madje ju kujtohet që sapo nisi puçi ushtarak i FETO-s, Berat Buzhala i Express ftoj të gjithë qytetarët e Kosovës t’i bashkohen ushtrisë (puçistëve), nuk është rastësi që edhe tash grupi KOHA dhe Express janë prej instrumenteve kryesore që bëjnë zhurmë.
Ndërsa agjenda anti-turke, agjenda anti vlerave islame të qeverisë, partisë së Erdoganit dhe agjenda anti-forcimit të rolit të Turqisë në botë bashkon armiq të ndryshëm të Turqisë. (Portali Koha Islame)
