Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Për ta parë nga afër progresin për luftimin e krimit dhe korrupsionit gjatë kësaj jave në Kosovë do të qëndrojë një delegacion i Bashkimit Evropian. Me këtë rast, përfaqësuesit e institucioneve, ministrja e Integrimit Evropian, Dhurata Hoxha dhe ministri i Drejtësisë, Abelard Tahiri, kanë shprehur optimizëm se Kosova do të marrë vlerësim pozitiv nga delegacioni evropian sa i përket luftimit të krimit të organizuar dhe korrupsionit si kriter i fundit për liberalizimin e vizave. Hoxha, ka bërë me dije se janë duke punuar ngushtë me të gjitha institucionet në mënyrë që para delegacionit të BE-së të paraqiten sa më mirë puna dhe progresi i arritur.
Edhe ministri Tahiri, ka thënë se ekipi teknik nga Komisioni Evropian që do të vijë në Kosovë ka për qëllim vlerësimin e progresit të bërë për përmbushjen e kriterit për liberalizimin e vizave, përkatësisht luftimin e korrupsionit dhe krimit të organizuar. Ai ka shtuar se duke qenë se është ekip teknik, vlerësimi i tyre, si dhe i Komisionit Evropian do të ketë qasje rekomanduese, pastaj u mbetet vendeve anëtare një nga një që ta determinojnë dhënien apo mosdhënien e liberalizimit të vizave. Megjithatë, Tahiri pret që Kosova t’i marrë kredencialet e duhura nga ky mision.
