Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Herët në mëngjes bëhet e ditur se forca të mëdha ushtarake, paraushtarake dhe policore serbe kanë rrethuar Reçakun. Detonimet dhe shpërthimet e fuqishme po dëgjohen deri këtu në Rafshnaltë.
Sipas të gjitha gjasave serbët po ndërmarrin një ofensivë në shkallë të gjerë, pasi që nga marrëveshja e tetorit, Hollbruk Milosheviq, nuk ka mbetur asgjë. Edhe trupat e OSBE-së që aktualisht po qëndrojnë në Kosovë, nuk po arrijnë të ushtrojnë asnjë ndikim në frenimin e kësaj politike gjenocidi, që po e ushtron regjimi serb kundër popullatës shqiptare.
Sot kemi transmetuar një emision 40 minutë me informata, komente dhe muzikë patriotike.
Nuk kemi informacione nga Zona e Neredimës dhe ende nuk dimë se ç’ po bëhet në Reçak. Krismat dhe detonimet ende nuk kanë pushuar.
Sapo e kemi transmetuar programin ditor së bashku me Berat Luzhën kemi shkuar në Shtab, në Divjakë.
Atje kemi takuar Jakup Krasniqin dhe Bislim Zyrapin.
Ndërkohë kanë ardhur Ramë Buja, Ferat Shala dhe Ramadan Dobra.
Ramë Buja na ka njoftuar se sipas disa burimeve, në Reçak ka shumë ushtarë dhe civilë të vrarë nga radhët tona. Ende nuk dihet numri i saktë por dyshohet se janë me dhjetëra.
Më vonë, Ferat Shala me xhipin e tij na ka përcjellë për në Berishë. Në seli kemi takuar Bajram Kosumin dhe Hilmi Ramadanin, të cilët kanë ardhur sot në orët e para ditës.
Gjatë tërë kohës kemi biseduar ashtu sikur bisedojnë zakonisht të burgosurit politikë. Berati e qorton Bajramin dhe përmes e tij edhe shokët e tjerë të cilët po hezitojnë të na bashkohen. Bajrami edhe pse është simpatizues i luftës, si duket ka rezerva. Nuk e di sesa është në gjendje të sakrifikojë. Megjithatë, ai është një kuadër i fortë dhe politikisht i ngritur. Mendoj se Bajrami, pastaj Mehmet Hajrizi, Hydajet Hyseni, Basri Musmurati e të tjerë mund të na ndihmojnë në raste të veçanta në ndonjë organizim politik dhe asnjëherë nuk kam insistuar, që ata doemos të futen në radhët tona, sikur insiston, Berat Luzha.
Të mirët dhe të dëshmuarit, kudo ku janë bëjnë punë. Në këtë segment kurrsesi nuk pajtohet Berat Luzha, duke harruar se edhe vetë ka ardhur me vonesë, dhe vetëm pasi ishte rrezikuar me rastin e burgosjes së shumë atdhetarëve në Ferizaj e në Kaçanik, nga policia serbe.
