Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Vetëvendosje, Albin Kurti, i cili po merr pjesë në punimet e Këshillit të Internacionales Socialiste, që po mbahet në selinë e OKB-së në Gjenevë, mbajti një fjalë gjatë të cilës shpalosi historinë e dhembshme të shqiptarëve të Kosovës dhe tregoi se Lëvizja që e drejton është opozita më e madhe në Kosovë, e orientuar majtas, që i kundërvihet qeverive neoliberale që kanë sunduar vendin në dy dekadat e shkuara. Duke iu drejtuar të pranishmëve, ndër të tjerë sekretarit të përgjithshëm, Luis Ajala, dhe president, George Papandreu, Kurti që në fillim të fjalës tregoi se Lëvizja Vetëvendosje, që e përfaqëson, e mori emrin prej parimit të rëndësishëm që shprehet në Nenin 1 të Kartës së Kombeve të Bashkuara. Kjo është një arsye më shumë për t’u ndjerë i nderuar që po flas para jush sot, këtu në Gjenevë, në vendin ku Kombet e Bashkuara janë themeluar. Si popull ne kemi dalë prej një kolonizimi që zgjati 100 vjet, kemi dalë prej luftës në fund të viteve ‘90, dhe i kemi mbijetuar një gjenocidi. Prandaj, si një Lëvizje politike, nuk kemi asnjë dyshim se ne jo vetëm që do mbijetojmë ndaj qeverisjes aktuale autoritare në Kosovë, por do të jemi fitimtarë, ka thënë mes tjerash, Albin Kurti.
Një pjesë e fjalimit të Albin Kurtit në punimet e Këshillit të Internacionales Socialiste, që po mbahet në selinë e OKB-së, në Gjenevë
Pothuajse gjysma e popullsisë tonë është lënë e papunë, ndërkohë që vetëm 1 në 8 gra të Kosovës kanë vend pune. Përmes modelit tonë ekonomik neo-Keynesian, përmes shtetit zhvillimor, ne jo vetëm që do ta luftojmë papunësinë; ne do të garantojmë të drejtat e punëtorëve, do të forcojmë sindikatat dhe do të mundësojmë kontratat kolektive, do të zvogëlojmë orët e punës dhe do të rrisim rrogën minimale dhe sigurinë në punë, do të luftojmë korrupsionin dhe do të rishpërndajmë të ardhurat në mënyrë të drejtë, përmes taksimit progresiv. Ky ndryshim do të thotë 24 orë ujë i pijshëm në çdo shtëpi; strehim social për të pastrehët; kanalizime dhe infrastrukturë për periferitë e parregulluara të qyteteve. Arsim e shëndetësi cilësore dhe falas, sepse këto nuk janë mallra për treg, janë të drejta që çdo qytetar duhet t’i gëzojë.
Kosova e shpalli pavarësinë në vitin 2008, e deri më sot është njohur nga 113 vende anëtare të Kombeve të Bashkuara. Në 2010 Gjykata Ndërkombëtare e Drejtësisë vendosi në favor të pavarësisë që ne kemi shpallur, dhe Kosova sot është anëtare e FMN-së, Bankës Botërore dhe shumë organizatave ndërqeveritare, duke përfshirë dhe FIFA-n.
Ne synojmë të bëhemi anëtarë të Bashkimit Evropian, sepse duam të japim kontributin tonë për një Evropë më sociale. Megjithatë, nuk jemi duke punuar vetëm për njohjet e jashtme për pavarësinë tonë. Ne kemi luftuar për lirinë tonë të përbashkët, por liria nuk lidhet veç me sovranitetin e jashtmë. Liria është edhe përgjegjësi, e jashtme ndaj vendeve të tjera, dhe e brendshme ndaj gjithë qytetarëve tanë. Përgjegjësia e çdo vendi dhe e çdo qeverie; që do të jetë edhe jona kur të jemi në qeveri, është të sigurojë të drejtat politike e ekonomike, sociale e kulturore të njerëzve, pa asnjë diskriminim.
Njerëzit në vendin tonë prej shumë kohësh po shpresojnë në këtë ndryshim, dhe janë duke u organizuar. Vitin e shkuar, në zgjedhjet parlamentare, Lëvizja jonë e dyfishoi mbështetjen dhe fitoi pjesën më të madhe të votave krahasuar me çdo parti tjetër politike. Si një Lëvizje politike ne i fituam zgjedhjet, por na e penguan ardhjen në qeverisje, me taktikat e orëve të fundit të pushtetarëve dhe me koalicionet joparimore të partive të djathta. Megjithatë rezultatet zgjedhore na treguan se e vetmja gjë që mundën të bëjnë, ishte të blenin pak kohë. Rënies së tyre i ka ardhur koha qëmoti. Socialdemokracia shumë shpejt do të fitojë. VV do të jetë qeverisësja e ardhshme e Kosovës.
Dua t’ju ftoj të gjithëve në Kosovë, që ta shihni ndryshimin që ka për të ardhur në një vend të vogël që nuk pranon të ketë për fat determinizmin neoliberal. Vizitojeni Kosovën që të takoheni me popullin tonë, të mësoni mbi betejat e shpresat tona, që besoj se për nga vlerat janë të ngjashme me betejat e shpresat tuaja. Dëshiroj t’ju ftoj secilin prej jush, ata që vijnë prej vendeve që e njohin pavarësinë e Kosovës, por edhe ata që ende nuk e kanë njohur. Ne dëshirojmë të kemi mundësinë të njihemi me ju, të mësojmë prej njëri-tjetrit, dhe të çojmë përpara betejën kundër pabarazisë, për drejtësi shoqërore e ndërkombëtare.
Ndryshe, në agjendën e punimeve të Këshillit do të trajtohet kontributi i social-demokracisë në zgjidhjen e konflikteve për siguri dhe paqe ndërkombëtare, tejkalimi i sfidave me të cilat ballafaqohet demokracia nëpër botë për të fituar lirinë dhe të drejtat për të gjithë, si dhe përgjigja e bazuar mbi vlerat dhe parimet globale në lidhje me krizën aktuale të refugjatëve.
