Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministri i Kulturës, Rinisë dhe Sportit, Kujtim Shala, ka vizituar sot Institutin Arkeologjik të Kosovës, ku është takuar me drejtuesit e këtij institucioni dhe me anëtarët e Këshillit Drejtues.
Ministri Shala u njoftua nga afër me programin që ka ky institucion për gërmimet arkeologjike në këtë vit, por edhe me angazhimet tjera në restaurim, konservim dhe veçmas në promovimin e trashëgimisë kulturore të Kosovës.
Ministri Shala u shpreh se MKRS-ja trashëgiminë kulturore e trajton me një kujdes të veçantë, ndaj edhe kërkoi nga drejtuesit e këtij institucioni që të punohet me intensitet të shtuar, sidomos në lokalitetin arkeologjik të Ulpianës, meqë sivjet ky lokalitet parashihet të shpallet Park Arkeologjik.
Po ashtu, Shala u shpreh se MKRS-ja po punon intensivisht në projektin e sinjalizimit të trashëgimisë kulturore, që gjithashtu është një projekt i rëndësi të veçantë për trashëgiminë e vendit tonë.
Ministri Shala gjithashtu kërkoi nga drejtuesit e IAK-ut që të punohet më shumë në fushën e publikimeve, sidomos në rezultat e gjetjeve nga fusha e arkeologjisë dhe përkthimin e tyre në gjuhë të huaja.
Drejtuesit e IAK-ut dhe anëtarë te Këshillit Drejtues biseduan për sfidat dhe punët që e presin këtë institucion këtë vit, si ato në fushën e gërmimeve arkeologjike në lokalitete të ndryshme nëpër Kosovë dhe me veprimtarinë botuese, në të cilën fushë pritet të ketë rezultate më të dukshme.
Ministri Shala drejtuesve të IAK-ut dhe KD u premtoi mbështetje dhe përkrahje në gjitha angazhimet e tyre profesionale dhe shkencore, duke u shprehur se rritja e buxhetit të sivjetshëm 20 % për trashëgiminë kulturore, është dëshmi se MKRS-ja ka kujdes të veçantë për këtë fushë.
