ASH: Për mospranimin e Kosovës në ENTSO, përgjegjëse është edhe Bashkimi Demokratik për Integrim

Partia opozitare shqiptare Aleanca për Shqiptarët në Maqedoni, ka reaguar ndaj mos pranimit të Kosovës në ENTSO, dhe për këtë kanë bërë përgjegjëse edhe BDI-në. “Vota e përmbajtur e Maqedonisë ndaj pranimit të Kosovës në Shoqatën evropiane të rrjetit energjetik ENTSO, e ka pamundësuar Kosovën që të bëhet pjesë e kësaj organizate të rëndësishme, për zhvillimin energjetik dhe ekonomik të Kosovës. Abstenimi i Maqedonisë ndaj Kosovës, në ENTSO, tregon se Maqedonia nuk e ka me gjithë mend njohjen e pavarësisë së Kosovës si shtet të pavarur dhe sovran, dhe në rastin në fjalë, vota abstenim, ka plotësuar vetëm dëshirën e Serbisë dhe të kryetarit Aleksandar Vuçiqit”, thuhet në reagimin e ASH-së. Nga atje shtojnë se vota abstenim e Maqedonisë ndaj Kosovës për në ENTSO, nxjerr në pah edhe vendimmarrjen politike në qeverinë e Republikës së Maqedonisë, duke mos e përfillur ose informuar BDI-në për një proces të tillë. “Aleanca për Shqiptarët i bën thirrje qeverisë së Maqedonisë që ta tërheq votën përmbajtur, ndaj Kosovës në ENTSO, ndërsa BDI si pjesë e koalicionit qeverisës të mbaj përgjegjësi politike, dhe ti kërkojë falje Qeverisë së Kosovës, që nuk ka takat politik, të ndikojë në vendimmarrje të tilla politike, sepse luan rolin e statistikat në Qeveri, duke aprovuar çdo vendim të LSDM, siç është edhe rasti në fjalë”, thuhet në deklaratën e Aleancës për Shqiptarët.