Luftëtari i lirisë së Kosovës, ish-oficeri i Armatës së Shqipërisë, Dritan Goxhaj, është arrestuar me të njëjtat pretendime që u arrestuan dhe u dënuan nga Gjykata Speciale, krerët e OVL-UÇK-së, Nasim Haradinaj dhe Hysni Gucati. Ndërkohë Gjykata Speciale ka bërë të ditur se Dritan Goxhajn e kanë arrestuar autoritetet e Shqipërisë, në Tiranë. Arrestimi është bërë për vepra të pretenduara penale kundër administrimit të drejtësisë që përfshijnë frikësim dhe pengim të personave zyrtarë. Në njoftim thuhet se Gjykata kërkoi bashkëpunimin dhe ndihmën e autoriteteve shqiptare për arrestimin mbi bazën e fletarrestimit të lëshuar nga një gjykatës i Speciales. Sipas komunikatës së Gjykatës Speciale, ai do të mbahet i paraburgosur në Shqipëri në pritje të vendimit të autoriteteve shqiptare lidhur me transferimin e tij në objektin e paraburgimit në Hagë. Kjo është hera e parë që Gjykata Speciale kryen arrestim në territorin e Shqipërisë, ashtu sikur Shqipëria kishte lejuar hulumtimet e Dik Martit, 13 vjet më parë, edhe pse nuk kishte kurrfarë obligimi ndërkombëtare. Thuhet se arrestimi është ndërmarrë pasi ndaj tij rëndon akuza se ka zbuluar emrat e dëshmitarëve në disa çështje penale, të ngritura pas luftës në Kosovë. Dritan Goxhaj e ka akuzuar më herët, Nazlie Balën, këshilltaren e ministres së Drejtësisë, Albulena Haxhiu, për dëshmitare të mbrojtur të Prokurorisë së Gjykatës Speciale, në Hagë. Goxhaj në shkrimin autorial “Mëmëdheu, UÇK-ja dhe Gjykata Speciale”, ka shkruar se Balaj është e afërme e njërit prej viktimave për të cilin është dënuar nga Gjykata Speciale ish-eprori i UÇK-së, Salih Mustafa. Dëshmitarja e tretë, e mbrojtur, pa identitet publik për opinionin quhet Nazlie Balaj, kishte saktësuar ish-oficeri i UÇK-së, Goxhaj, i cili kishte zbuluar edhe dy persona të tjerë për dëshmitarë të mbrojtur të Prokurorisë Speciale…
![](https://www.radiokosovaelire.com/wp-content/uploads/Dritan-Goxhaj--660x330.jpeg)